Pandemiya dönəmində ölkə ərazisində bir sıra məhdudiyyətlər tətbiq edilsə də, zamanla onlar aradan qaldırılır. "Bakı Metropoliteni” də yeni tədris ilinin açılması ilə eyni vaxtda öz fəaliyyətini bərpa etdi. Metropoliten sərnişindaşımada hər zaman mühüm önəm kəsb edib və paytaxt ərazisində nəqliyyat sıxlığının azalmasına təsir göstərib. Bir sıra sahələrin yenidən əvvəlki normal fəaliyyətə başlaması, şübhəsiz ki, metroda sərnişindaşımaya da təsirsiz ötüşmür.
Bu səbəbdən də, "Bakı Metropoliteni” pik saatlarda qatarlar arasında intervalı azaldır. Elə bu günlərdə qurumun yaydığı açıqlamada da müəyyən edilmiş pik saatlarda intervalın 2 dəqiqəyə endirildiyi bildirilirdi. Lakin metrodan daha çox istifadə edən şəxslər iddia edirlər ki, pik saatlarda 2 dəqiqəlik intervala riayət olunmur. Qatarlar 3,5-4 dəqiqə aralığında hərəkət edirlər ki, bu da pik saatlarda sıxlığa səbəb olur. Əgər belə bir durum varsa, ləngimələrə səbəb nədir?
Məsələ ilə bağlı “Kaspi” qəzeti araşdırma aparıb.
Mövzu ilə bağlı "Kaspi” qəzetinə açıqlamasında "Bakı Metropoliteni” QSC-nin mətbuat xidməti və ictimaiyyətlə əlaqələr şöbəsinin rəisi Bəxtiyar Məmmədovbildirdi ki, yeni tədris mövsümü başlayandan metropolitendə yubanma cəmi bir dəfə qeydə alınıb: "Bu, "İçərişəhər" stansiyasında qatara növbəti baxış keçirilməsi ilə bağlı olub. Həm də hadisə səhər pik saatdan əvvəl və qatarların xəttə çıxması dövrünə təsadüf etdiyindən, yalnız iki qatar arasında intervalda əksini tapıb. Başqa sözlə, ciddi qrafik pozulması, cədvəldən kənara çıxılma olmayıb. Ümumən metropolitendə 2-dəqiqəlik interval gur saatlarda tətbiq edilir. Yəni səhər 7:30-dan 9:30-a qədər, axşam 17:30-dan 19:30-a qədər. Bu iddia "28 May-Həzi Aslanov" sahəsinə aiddir. Təbii olaraq, iki xətt "28 May" stansiyasında kəsişdiyindən, bu stansiyadan həm "Dərnəgül", həm də "İçərişəhər" istiqamətində interval 2 dəfə böyüyür. Amma ümumən, gün ərzində ehtiyat qatarlar nəzərdə tutulur və lazım olduqda xəttə buraxılır. Bütövlükdə monitorinqlərlə bağlı qeydlərimdə yubanma, qrafik pozulması yoxdur. Yeganə istisna yuxarıda qeyd etdiyim iki qatar arasındakı intervaldır. Əgər hər hansı şübhə varsa, məmnuniyyətlə araşdırarıq”.
Metropoliten rəsmisi qeyd etdi ki, ümumən, yoxlama-nəzarət mexanizmlərində diqqət yetirilən əsas hədəflərdən biri də qapıların saxlanmamağına yönəldilib: "Hələlik, müsbət tendensiya var. İl yarımdan artıqdır ki, pandemiya şəraitində olduğumuzdan və metropolitenin fəaliyyətində zamanla məhdudiyyətlər tətbiq edildiyindən, sərnişinlər arasında metrodan istifadənin bir sıra məqamlarını xüsusi nəzarətdə saxlayır və onlar arasında iş aparırıq. Monitorinqlərə uyğun olaraq, tədris mövsümü tam həcmdə başladığından, sərnişinlərin axın istiqamətləri, gün ərzində sıxlıq müddətləri xüsusi araşdırılır.
Metrodan ilk dəfə və ya buna qədər az istifadə edənlərin uyğunlaşması, səmti daha asan və avtomatik müəyyən etməsi və s. praktiki vərdişlərin formalaşması kimi məsələlərə də xüsusi diqqət yetiririk. Hətta 2019-cu illə müqayisədə müsbət cəhətlər çoxdur. Bunu qoruyub saxlamaq metropolitençilərlə sərnişinlərin birgə və qarşılıqlı münasibətindən də çox asılıdır. Pandemiya dövründə maskanın düzgün taxılmasına bundan sonra da ciddi əməl olunsa, müsbətə doğru irəliləyiş davam edəcək. Bir də onu xüsusi qeyd edim ki, daşımaya, qrafikin pozulmasına gətirib çıxaran yubanma və onun səbəblərini açıq şəkildə ictimaiyyətə dərhal açıqlayırıq. Gizli heç nə saxlamırıq”.
B.Məmmədov əsaslı sərnişin artımının olduğunu vurğulayıb: "Amma bunu, yəqin, hər kəs bilir və gözləyirdi. Tədrisin tam həcmdə başlaması və bu şəraitdə metropolitendə seyrəklik müşahidə etməyin qeyri-mümkün olacağını adi məntiq də deyirdi. Əgər normal həyata qayıdışdan danışırıqsa, 2020-ci ilin martına qədər olan dövrdəki kimi metroda gur saatlarda sıxlıq, dərs vaxtının başa çatmasından asılı olaraq bəzi stansiyaların dolub-boşalması, zamanla daşıma yükünün artması adi hal sayılmalı deyil? Mən başqa cür təsəvvür etmirdim də”.
