İnsan bəzən sadəcə pis gün keçirə və ya yorğun ola bilər. Lakin bəzi ifadələrin davamlı şəkildə təkrarlanması onun uzun müddət davam edən emosional və psixoloji yorğunluq yaşadığını göstərə bilər.
HİT.az xəbər verir ki, bu barədə "Your Tango" yazıb.
Mütəxəssislərin fikrincə, gündəlik söhbətlərdə işlədilən bəzi cümlələr insanın emosional gücünün tükəndiyinə dair siqnallar ola bilər.
“Mənə artıq heç nə maraqlı deyil”
Bu ifadə bəzən sadə laqeydlik kimi qəbul edilir. Ancaq insan uzun müddət narahatlıq və stress içində yaşadıqda, müəyyən mərhələdə emosional enerjisi tükənə bilər. Belə halda laqeydlik əslində artıq mübarizə aparmağa gücün qalmadığını göstərə bilər.
“Mən çox yorulmuşam”
Davamlı yorğunluqdan danışmaq insanın gündəlik məsuliyyətlərin öhdəsindən gəlmək üçün əvvəlki qədər enerjisinin olmadığını göstərə bilər. Hətta kiçik problemlər belə ona böyük yük kimi görünməyə başlayır.
“Nə hiss etdiyimə əmin deyiləm”
Uzunmüddətli emosional gərginlik insanın öz hisslərini müəyyənləşdirməsini çətinləşdirə bilər. Qəzəb, kədər, narahatlıq və boşluq hissi bir-birinə qarışdıqda insan yaşadıqlarını ifadə etməkdə çətinlik çəkir.
“Əhvalım yoxdur”
Sevdiyi fəaliyyətlərdən, dostlarla görüşlərdən və digər planlardan davamlı imtina edən insan emosional cəhətdən tükənmiş ola bilər. Belə vəziyyətdə hətta əyləncə belə əlavə öhdəlik kimi görünür və insan tək qalmağa üstünlük verir.
“Hər şey normaldır”
Bu ifadə bəzən əsl problemin gizlədilməsi üçün istifadə olunur. İnsan başqalarını narahat etmək istəmədiyi üçün çətinliklərini bölüşmək əvəzinə hər şeyin qaydasında olduğunu deyə bilər. Lakin problemləri davamlı şəkildə öz daxilində saxlamaq emosional yükü daha da artıra bilər.
“Artıq hər şeyin pis getməsinə öyrəşmişəm”
Bu cümlə insanın dəfələrlə məyus olduğunu və yaxşı nəticə gözləməkdən vaz keçdiyini göstərə bilər. Belə insanlar özlərini yeni məyusluqlardan qorumaq üçün əvvəlcədən ən pis ssenarini düşünməyə başlayırlar.
“Məni rahat burax”
İnsan emosional cəhətdən tükəndikdə hətta yaxınlarının diqqəti belə ona ağır gələ bilər. Tək qalmaq və heç kimə nəsə izah etməmək həmin şəxs üçün daha asan görünür.
“Bunun heç bir əhəmiyyəti yoxdur”
Bu ifadə bəzən insanın öz hisslərini izah etməkdən və mübahisə aparmaqdan yorulduğunu göstərir. O, anlaşılacağına ümidini itirdikdə məsələni davam etdirmək əvəzinə söhbəti bitirməyə çalışa bilər.
“Mənə bu artıq maraqlı deyil”
Əvvəllər zövq aldığı fəaliyyətlərə marağın itməsi də diqqət çəkən əlamətlərdəndir. İnsan hobbilərindən, sosial fəaliyyətlərdən və gələcəklə bağlı planlardan uzaqlaşmağa başlayırsa, bunun arxasında emosional tükənmə dayana bilər.
Bu ifadələrdən birinin ara-sıra işlədilməsi mütləq emosional tükənmə demək deyil. Lakin bir neçə əlamət uzun müddət davam edirsə və gündəlik həyata təsir göstərirsə, vəziyyətə ciddi yanaşmaq və lazım gəldikdə mütəxəssisdən dəstək almaq faydalıdır.
Samir
