Təyyarə ilə səyahət zamanı geyim seçimi yalnız görünüş baxımından deyil, rahatlıq və təhlükəsizlik baxımından da əhəmiyyətlidir. Təcrübəli stüardessa sərnişinlərə bəzi geyimlərdən uzaq durmağı, əvəzində rahat və qat-qat geyinməyi tövsiyə edib.
HİT.az xəbər verir ki, Danimarkalı stüardessa Sille Ridel özünün “Travel with SilleRydell” bloqunda uçuş zamanı geyinilməsini məsləhət görmədiyi dörd geyim növünü açıqlayıb.
Onun sözlərinə görə, bu seçimlər ilk baxışdan rahat görünsə də, uçuş zamanı sərnişin üçün narahatlıq yarada və bəzi hallarda təhlükəsizlik baxımından problemə çevrilə bilər.
Şəp-şəp
Stüardessanın fikrincə, uçuş zamanı ayaqlar şişə və salonda temperatur aşağı ola bilər. Bundan başqa, fövqəladə vəziyyətdə təxliyə zamanı şəp-şəplə hərəkət etmək çətinləşə bilər.
Şort və qısa üst geyimləri
Ridel təyyarədə kondisionerlərin kifayət qədər güclü işlədiyini xatırladıb. Bu səbəbdən açıq geyimdə olan sərnişinlər uçuş zamanı üşüyə bilər.
O, həmçinin açıq dərinin təyyarə oturacağı ilə birbaşa təmasda olmasının xoşagəlməz ola biləcəyini qeyd edib.
Dar cinslər
Stüardessa uçuş zamanı bədəndə şişkinlik yarana biləcəyini bildirib. Bu səbəbdən bir neçə saat dar cins geyinərək oturmaq narahatlıq yarada bilər.
Yalnız bir nazik geyim qatı
Təyyarədə hava bəzən gözlənildiyindən daha soyuq olur. Bu, xüsusilə isti ölkəyə uçan sərnişinlər üçün problem yarada bilər.
Ridel sərnişinlərə üzərilərində əlavə jaket, sviter və ya digər isti geyim saxlamağı tövsiyə edir. Beləliklə, temperaturdan asılı olaraq geyim qatını artırmaq və ya azaltmaq mümkündür.
Bəs təyyarədə nə geyinmək lazımdır?
Təcrübəli stüardessa uçuş üçün rahat, bədəni kifayət qədər örtən və bir neçə qatdan ibarət geyim seçməyi məsləhət görür.
Onun fikrincə, belə geyim həm uzun uçuş zamanı rahatlığı artırır, həm də salondakı temperatur dəyişikliklərinə uyğunlaşmağa imkan verir.
Stüardessa sərnişinlərə geyim seçərkən yalnız dəbli görünüşü deyil, uçuş müddətini, salondakı temperaturu və fövqəladə vəziyyət zamanı rahat hərəkət etmə imkanını da nəzərə almağı tövsiyə edib.
Samir
