Payızın gəlişi ilə pişiklərin yuxu rejimində müəyyən dəyişikliklər müşahidə oluna bilər. Lakin heyvanın əvvəlkindən xeyli çox yatması bəzi hallarda sağlamlıq problemi ilə bağlı ola bilər.

HİT.az xəbər verir ki, baytar həkim Lori Rossun sözlərinə görə, yetkin pişiklər sutka ərzində adətən 12-16 saat yatır. Balaca və yaşlı pişiklər, eləcə də fərdi xüsusiyyətlərindən asılı olaraq bəzi heyvanlar daha çox yata bilər.

Mütəxəssis bildirir ki, pişiyin neçə saat yatmasından daha çox onun yuxu vərdişlərindəki dəyişikliklərə diqqət yetirmək lazımdır.

Payızda pişiklər niyə daha çox yatır?

Havanın soyuması və gün işığının azalması pişiklərin aktivliyinə təsir göstərə bilər. Ev şəraitində yaşayan heyvanlar da temperaturun aşağı düşməsi və gündəlik rejimdəki dəyişikliklər səbəbindən daha az hərəkət edib daha çox yata bilərlər.

Bununla belə, pişikdə yuxululuqla yanaşı halsızlıq və digər qeyri-adi əlamətlər müşahidə olunursa, bunu yalnız mövsümlə əlaqələndirmək düzgün deyil.

Baytarlar aşağıdakı hallarda heyvanın vəziyyətinə xüsusi diqqət yetirməyi tövsiyə edirlər:

* iştahanın kəskin azalması və ya yeməkdən imtina;
* nəfəs almaqda çətinlik, sürətli və ya ağız açıq şəkildə nəfəs alma;
* uzun müddət davam edən qusma və ya ishal;
* əvvəlkindən daha çox gizlənmək və insanlardan uzaqlaşmaq;
* yeriməkdə çətinlik, gücsüzlük və ayağa qalxmaqda problem;
* sidiyə çıxma vərdişlərində dəyişiklik və ya tualetə gedərkən çətinlik.

Mütəxəssisin sözlərinə görə, pişiyin yuxu rejimində nəzərəçarpacaq və davamlı dəyişiklik baş veribsə, xüsusilə də bu dəyişiklik digər simptomlarla müşayiət olunursa, baytar həkimə müraciət etmək lazımdır.

Samir