"Formula 1" üzrə Azərbaycan Qran-prisində ikinci sərbəst yürüş başa çatıb.
HİT.az xəbər verir ki, "Mersedes" pilotu Corc Rassell növbəti dəfə ən yaxşı nəticəni göstərib.
Onun komanda yoldaşı Andrea Kimi Antonelli ikinci, "Red Bull"dan Maks Ferstappen üçüncü olub.
C. Rassell günün ilk yarısında birinci sınaq yürüşündə də ən yaxşı nəticəni göstərmişdi.
Qeyd edək ki, Bakıdakı Qran-pri sentyabrın 26-da başa çatacaq.
13.42
"Formula 1" üzrə Azərbaycan Qran-prisində ilk sərbəst yürüş başa çatıb.
HİT.az-ın məlumatına görə, ən yaxşı nəticəni "Mersedes" pilotu Corc Rassell göstərib.
"Red Bull"dan Maks Ferstappen ikinci, "Ferrari"dən Şarl Lekler üçüncü olub.
12.40
"Formula 1" üzrə Azərbaycan Qran-prisinə start verilib.
HİT.az xəbər verir ki, birinci sərbəst yürüş saat 12:30-da başlayıb.
Bu gün əsas pilotların ikinci sınaq yürüşü də gerçəkləşəcək.
Bakıdakı Qran-pri sentyabrın 26-da başa çatacaq.
09.00
Bu gün "Formula 1" üzrə Azərbaycan Qran-prisinə start veriləcək.
HİT.az-ın məlumatına görə, ilk gündə iki sərbəst yürüş keçiriləcək.
Bundan əlavə, "Formula 2"də də sınaq yürüşü ilə yanaşı, sıralama turları gerçəkləşəcək.
20 döngə, 51 dövrədən ibarət olan Bakı treki ümumilikdə 306,049 km məsafəni əhatə edir.
Paytaxtdakı ilk yarış Avropa Qran-prisi kimi 2016-cı ildə baş tutub. Sonrakı yeddi turnir Azərbaycan Qran-prisi adlanıb.
2016-cı ildə almaniyalı Niko Rosberq yarışı hamıdan tez tamamlayıb. Növbəti illərdə müvafiq olaraq Daniel Rikkardo (Avstraliya), Lüis Hemilton (Böyük Britaniya), Valtteri Bottas (Finlandiya), Serxio Peres (Meksika) və Maks Ferstappen (Niderland) treki birinci pillədə başa vurublar. 2023-cü ildə isə Peres ikinci dəfə Bakıda qalib gəlib. 2024-cü ildə Oskar Piastri (Avstraliya), 2025-ci ildə Maks Ferstappen bütün rəqiblərini qabaqlayıb.
2020-ci ildə koronavirus pandemiyası səbəbindən Bakıda yarış təşkil olunmayıb.
Azərbaycan Qran-prisinədək "Mersedes"in italiyalı pilotu Andrea Kimi Antonelli 292 xalla liderdir. Onun Böyük Britaniyadan olan komanda yoldaşı Corc Rassell (211 xal) ikinci, "Ferrari"dən Lüis Hemilton (191 xal) üçüncüdür.
Konstruktorlar Kubokunda da "Mersedes" liderdir - 503 xal. "Ferrari" ikinci (358 xal), "Maklaren" (306 xal) üçüncü pillədə qərarlaşıb.
Azərbaycan Qran-prisində ilk günün proqramı:
10:00. "Formula 2": Sərbəst yürüş
12:30. "Formula 1": Birinci sərbəst yürüş
14:00. "Formula 2": Birinci sıralama turu
14:30. "Formula 2": İkinci sıralama turu
16:00. "Formula 1": İkinci sərbəst yürüş
