Gecə qəfil oyanmalar ən çox stress, kofein və ya alkoqol qəbulu ilə bağlı olur. 

HİT.az xəbər verir ki, bu barədə "The Conversation" yazıb.

Məqalədə qeyd edilir ki, gecə təxminən saat 03:00 radələrində yuxu təbii olaraq daha səthi mərhələyə keçir. Bu, yuxu dövrlərinin təbii dəyişməsi və orqanizmin səhərə hazırlanması ilə bağlıdır. Adətən bu keçidlər hiss olunmur, lakin həmin vaxt insan daha asan oyanır.

Gecə oyanmalarının ən yayğın səbəbləri kimi stress və stimullaşdırıcı maddələrin istifadəsi göstərilib. Stress sinir sisteminin həssaslığını artırır və nəticədə xarici və ya daxili kiçik dəyişikliklər belə oyanmaya səbəb ola bilər.

"Alkoqol və kofein isə yuxunun keyfiyyətini pisləşdirir. Alkoqol yuxululuq yaratsa da, yuxunu daha səthi və parçalanmış edir. Kofein isə stimullaşdırıcı təsir göstərərək dərin yuxunu azaldır və gecə oyanma ehtimalını artırır”, deyə nəşr bildirib.

Qeyd olunur ki, bu maddələrin təsiri yatmazdan bir neçə saat əvvəl qəbul edildikdə belə davam edə bilər. Ekspertlər vurğulayıb ki, bu cür oyanmalar hər zaman yuxu pozuntusu sayılmır, lakin tez-tez təkrarlanarsa, stress səviyyəsi və axşam vərdişlərinə diqqət yetirmək lazımdır.

Samir