Sağlam qidalanmaya və həzm sisteminin normal işləməsinə diqqət edən insanlar getdikcə daha çox təbii üsullara üstünlük verirlər. Bu məhsullardan biri də kətan toxumudur. 

HİT.az xəbər verir ki, bu barədə “Rynek Zdrowia” yazır.

Nəşrin məlumatına görə, kətan toxumu “superqida” hesab olunur, çünki tərkibində çoxlu faydalı maddələr var: zülal, B qrupu vitaminləri, maqnezium, kalium, dəmir, kalsium və fosfor.

Bundan əlavə, kətan toxumu omeqa-3 yağ turşularının, xüsusilə alfa-linolen turşusunun mənbəyidir. Məhz lif, sağlam yağlar və mineralların birləşməsi bu məhsulu pəhriz saxlayan insanlar üçün xüsusilə faydalı edir.

Nəşrdə kətan toxumundan hazırlanan içkinin resepti də paylaşılıb. Bu içki uzun illərdir bağırsaq fəaliyyətini dəstəkləyən sadə vasitə kimi tanınır.

Hazırlanma qaydası belədir: bir xörək qaşığı üyüdülmüş kətan toxumu isti suya əlavə olunur və 1–2 saat dəmlənir. Bu müddət ərzində qarışıq qalın, jeleyəbənzər konsistensiya alır.

Mütəxəssislərin izahına görə, kətan toxumunun təsirində əsas rolu qida lifləri oynayır. O, həm suda həll olan, həm də olmayan liflərə malikdir:

* həll olmayan liflər bağırsaqda suyu bağlayaraq həcmi artırır və qəbizliyin azalmasına kömək edə bilər
* həll olan liflər isə həzmi yavaşladır və toxluq hissini daha uzun saxlayır

Qeyd olunur ki, kətan toxumunun müntəzəm istifadəsi qan şəkərinin sabitləşməsinə və xolesterin səviyyəsinin tənzimlənməsinə də kömək edə bilər. Bu təsirlər lif və omeqa-3 yağ turşuları ilə əlaqələndirilir.

Həmçinin kətan toxumunun immun sisteminə də müsbət təsir etdiyi bildirilir. Tərkibindəki arginin və qlutamin turşusu kimi amin turşuları orqanizmdə bir çox proseslərdə iştirak edir.

Bununla belə, mütəxəssislər xəbərdarlıq edirlər ki, həddindən artıq lif qəbulu və kifayət qədər su içilməməsi həzm narahatlıqlarına səbəb ola bilər.

Həmçinin qeyd olunur ki, çox miqdarda kətan toxumu istifadəsi köp, qaz, qarın ağrısı və ürəkbulanma yarada bilər. Böyüklər üçün gündəlik tövsiyə olunan norma 20–30 qramdır.

Samir