İsrailin Texnion İnstitutunun alimlərinin son tədqiqatları nar şirəsinin ürək-damar sağlamlığına təsiri barədə yeni nəticələr ortaya qoyub. 

HİT.az xəbər verir ki, bu barədə “Medonet Zywienie” yazır.

Araşdırmalara görə, gündə təxminən 240 ml (bir stəkan) təmiz, şəkərsiz nar şirəsinin müntəzəm qəbulu arterial təzyiqin azalmasına və aterosklerozun inkişafının yavaşımasına kömək edə bilər.

Mütəxəssislərin bildirdiyinə görə, nar şirəsi polifenollarla — güclü antioksidantlarla zəngindir. Bu maddələr orqanizmi oksidativ stressdən qoruyur. Hətta onun antioksidant təsirinin yaşıl çay və qırmızı şərabla müqayisədə təxminən üç dəfə güclü olduğu qeyd olunur.

Tədqiqatlar göstərir ki, nar şirəsinin müntəzəm qəbulu təkcə qan təzyiqini azaltmır, həm də infarkt və insult riskini azalda bilər. Bundan əlavə, artıq mövcud damar zədələrinin azalmasına da müsbət təsir göstərə biləcəyi bildirilir.

Ekspertlər ürək-damar xəstəliklərinin profilaktikası üçün nar şirəsinin gündəlik rasiona daxil edilməsini tövsiyə edirlər. O, xüsusilə portağal kimi ənənəvi şirələrə alternativ kimi dəyərləndirilir.

Bununla belə, mütəxəssislər xəbərdarlıq edirlər ki, nar şirəsi dərman müalicəsini və həkim məsləhətini əvəz etmir. Hipertoniya və ya xolesterin salıcı dərmanlar qəbul edən şəxslər onun istifadəsindən əvvəl mütləq həkimlə məsləhətləşməlidirlər, çünki nar şirəsi bəzi preparatlarla qarşılıqlı təsir göstərə bilər.

Mütəxəssislərin ümumi qənaətinə görə, nar şirəsi ürək və damar sağlamlığını dəstəkləyən təbii vasitədir, lakin onun effekti sağlam həyat tərzi, düzgün qidalanma və fiziki aktivliklə birlikdə daha güclü olur.

Samir