Diyetoloqlar gündəlik içki seçimlərinin arterial təzyiqə düşündüyümüzdən daha çox təsir edə biləcəyini bildirirlər. 

HİT.az xəbər verir ki, “Verywell Health” üçün danışan 4 mütəxəssis təzyiqi azaltmağa kömək edə bilən ən faydalı içkiləri açıqlayıb.

Nar şirəsi

Diyetoloq Suzan Fişer bildirir ki, nar şirəsi yalnız dadlı deyil, həm də təzyiqin azalmasına kömək edə bilər:

“Gündə 1 stəkan nar şirəsi təzyiqi aşağı sala bilər. O, kalium və antioksidantlarla zəngindir və orqanizmdə azot oksidinin istehsalını artırır. Bu maddə damarların genişlənməsinə kömək edir və qan dövranını yaxşılaşdırır”.

Mütəxəssis nar şirəsinin müxtəlif formada istifadə edilə biləcəyini də vurğulayır: buzla, qazlı su ilə qarışdırılmış içkilərdə, smuzi və yoqurtlarda, hətta salat souslarında və marinadlarda.

Yaşıl çay

Diyetoloq Simona Harunyan yaşıl çayın ürək sağlamlığı və təzyiq üçün faydalı olduğunu bildirir.

Yaşıl çay damarların rahatlamasına kömək edir, qan dövranını yaxşılaşdırır və antioksidantlarla zəngindir. Həmçinin iltihab əleyhinə təsir göstərir və uzunmüddətli istifadə zamanı təzyiqin azalmasına dəstək ola bilər.

O əlavə edir ki, yaşıl çay şəkərsiz içilməli və kofein tərkibli olduğu üçün səhər qəhvəsinə alternativ ola bilər.

Hibiskus çayı

Diyetoloq Lena Bil hibiskus çayını təzyiqi azaltmaq üçün ən elmi əsaslandırılmış təbii içkilərdən biri adlandırır:

“Bu çay damarların genişlənməsinə kömək edən antosiyaninlərlə zəngindir və həm sistolik, həm də diastolik təzyiqi azalda bilər”.

Hibiskus həm də antioksidant təsir göstərir və xolesterinin tənzimlənməsinə kömək edə bilər. Limon və ya darçınla birlikdə istifadə edildikdə dadı daha da yaxşılaşır.

Çuğundur şirəsi

Diyetoloq Roksana Esani isə çuğundur şirəsini ən təsirli təzyiq azaldıcı içkilərdən biri kimi qeyd edir.

Çuğundur yüksək miqdarda təbii nitratlar ehtiva edir və bu maddələr damarların genişlənməsinə kömək edir. Həmçinin kalium, maqnezium və C vitamini ilə zəngindir.

O, evdə çuğundur şirəsinin alma, kök, zəncəfil və limonla qarışdırılaraq hazırlanmasını tövsiyə edir.

Təzyiqi azaltmaq üçün gündəlik vərdişlər

Mütəxəssislər bildirirlər ki, içkilər faydalı olsa da, ümumi həyat tərzi daha vacib rol oynayır. Faydalı qidalar, duzun azaldılması, müntəzəm fiziki aktivlik və stressin idarə olunması da təzyiqə müsbət təsir göstərir.

Samir