Balıq yağı, qoz, kətan toxumu… Omeqa-3 yağ turşuları uzun illərdir həm ürək, həm də beyin sağlamlığı üçün faydalı hesab olunur. Xüsusilə yaşlı əhali arasında bu əlavələr ən çox etibar edilən qida əlavələrindən biridir.

HİT.az xəbər verir ki, orqanizmin bu yağ turşularını özü istehsal edə bilməməsi onların xaricdən qəbulunu zəruri edir. Lakin Alzheimer sahəsinə fokuslanan ixtisaslaşmış bir jurnalda yayımlanan yeni araşdırma bu ümumi qənaəti sual altına alıb.

Çinin Çunçin şəhərində aparılan tədqiqat qrupu geniş Alzheimer layihəsindən toplanmış məlumatları təhlil edib. Balıq yağı və kətan toxumu yağı da daxil olmaqla müxtəlif Omeqa-3 əlavələrindən istifadə edən yaşlı insanların koqnitiv dəyişiklikləri bir neçə fərqli ölçmə sistemi ilə izlənilib.

Nəticələr gözlənilməz olub: Omeqa-3 əlavəsi qəbul edən bəzi iştirakçılarda Alzheimerin irəliləmə sürətinin daha yüksək olduğu müşahidə edilib.

Araşdırma “The Journal of Prevention of Alzheimer’s Disease” jurnalında dərc olunub və mövcud sağlam qidalanma tövsiyələrinin yenidən qiymətləndirilməsi ilə bağlı suallar doğurub.

Araşdırmanın diqqət çəkən məqamlarından biri də təsirin klassik Alzheimer mexanizmlərindən fərqli bir yolla baş verməsidir. Tədqiqatçılar Omeqa-3 əlavələrinin beyində sinir hüceyrələri arasındakı əlaqəni təmin edən “sinaps” strukturlarında pozulmalara səbəb ola biləcəyini ehtimal edirlər.

Bu əlaqə şəbəkəsinin zəifləməsi isə koqnitiv geriləməni sürətləndirə bilər. Yəni uzun müddət faydalı hesab edilən bu yağ turşuları bəzi hallarda əks təsir göstərə bilər.

Tədqiqatçılar vurğulayır ki, Omeqa-3 təsiri hər insanda eyni deyil. Effekt fərdin ümumi sağlamlıq vəziyyətindən və beyin funksiyalarının mövcud vəziyyətindən asılı olaraq dəyişə bilər.

Daha geniş araşdırmalara ehtiyac olsa da, bu nəticələr vacib bir sual yaradır: illərlə “beyin qoruyucu” kimi qəbul edilən Omega-3 əlavələri yaşlı insanlar üçün həmişə təhlükəsiz və faydalı seçimdirmi?

Samir