Alkoqol beyində amiloid zülalının toplanması zamanı neyronlar arasında siqnalların ötürülməsini zəiflədə, tau zülalından yaranan yumaqların mövcudluğu halında isə əksinə, bu prosesi gücləndirə bilər. 

HİT.az xəbər verir ki, araşdırmanın nəticələri “Neuropharmacology” jurnalında dərc olunub.

Tədqiqatçılar Altseymer xəstəliyinin iki modelini araşdırıblar. Birinci modeldə xəstəlik neyronlar arasında amiloid lövhəciklərinin toplanması, ikinci modeldə isə sinir hüceyrələrinin daxilində tau zülalından ibarət yumaqların yaranması ilə xarakterizə olunub.

Daha sonra alimlər öyrənmə, qərar qəbul etmə və yeni şəraitə uyğunlaşma proseslərinə cavabdeh olan neyron şəbəkəsinin fəaliyyətinə alkoqolun necə təsir etdiyini qiymətləndiriblər.

Məlum olub ki, xəstəliyin amiloid forması zamanı alkoqol sinir hüceyrələri arasında siqnalların ötürülməsini zəiflədib. Tau patologiyası zamanı isə əksinə, bu ötürülməni gücləndirib.

Tədqiqat müəlliflərinin sözlərinə görə, onlar xəstəliyin növündən asılı olmayaraq alkoqolun eyni dərəcədə mənfi təsir göstərəcəyini gözləyirdilər. Lakin nəticələr göstərib ki, eyni amil xəstəliyin inkişaf mexanizmindən asılı olaraq tamamilə fərqli təsirlər yarada bilər.

Bununla yanaşı, alimlər vurğulayıblar ki, əldə edilən nəticələr alkoqolun hər hansı faydalı təsirə malik olduğunu göstərmir. Əksinə, araşdırma onun Altseymer xəstəliyi zamanı beyinə təsirinin düşünüldüyündən daha mürəkkəb olduğunu ortaya qoyur.

Tədqiqat zamanı həmçinin müəyyən edilib ki, alkoqol beynin immun hüceyrələri olan mikroqliyanın fəaliyyətini pozur. Bu hüceyrələr zədələnmiş hüceyrələrin və patoloji zülalların təmizlənməsində mühüm rol oynayır. Ən nəzərəçarpan dəyişikliklər amiloid lövhəciklərinin olduğu modeldə müşahidə edilib ki, bu da müəlliflərin fikrincə, sinir toxumasının daha da zədələnməsinə səbəb ola bilər.

Alimlər qeyd ediblər ki, araşdırma heyvanlar üzərində aparıldığı üçün nəticələri hələlik insanlara şamil etmək mümkün deyil. Bunun üçün əlavə klinik tədqiqatların aparılmasına ehtiyac var.

Samir