“BeMother” layihəsi çərçivəsində aparılan araşdırma göstərib ki, hər bir hamiləlik qadın beyninə fərqli şəkildə təsir edir. 

HİT.az xəbər verir ki, bu barədə “Metro” nəşri məlumat yayıb.

Amsterdam Universitetinin alimləri yüzlərlə qadının hamiləlikdən əvvəl, hamiləlik dövründə və doğuşdan altı ay sonra maqnit-rezonans tomoqrafiyası (MRT) vasitəsilə beyin görüntülərini təhlil ediblər.

Araşdırma nəticəsində məlum olub ki, ilk hamiləlik zamanı boz maddənin həcmi orta hesabla 5 faiz azalır. Bu dəyişikliklər əsasən xəyal qurma, xatirələr və özünü təhlil etmə ilə əlaqəli beyin nahiyələrində müşahidə olunur.

Alimlər vurğulayıblar ki, bu, beynin zədələnməsi demək deyil. Onların izahına görə, söhbət “sinaptik budanma” adlanan təbii prosesdən gedir. Bu zaman zəif sinir əlaqələri aradan qaldırılır, daha vacib əlaqələr isə gücləndirilir. Nəticədə beyin analıq vəzifələrini yerinə yetirmək üçün daha səmərəli fəaliyyət göstərməyə uyğunlaşır.

Doğuşdan sonra itirilmiş boz maddənin bir hissəsi bərpa olunsa da, əvvəlki səviyyəyə tam qayıtmır.

Tədqiqat göstərib ki, ikinci hamiləlik zamanı bu dəyişikliklər təkrarlanmır, əksinə, inkişaf etdirilir. İlk hamiləlikdə yenidən formalaşmış əsas beyin nahiyələrində yalnız cüzi dəyişikliklər qeydə alınıb, çünki uyğunlaşma üçün baza artıq yaradılıb.

Bunun əvəzində diqqət və reaksiyaya cavabdeh olan sinir şəbəkələri daha da aktivləşir. Alimlərin fikrincə, bu dəyişiklik ana beyninin eyni vaxtda bir neçə uşağa qayğı göstərmək ehtiyacına uyğunlaşmasının göstəricisidir.

Samir