B3 vitamini (nikotinamid) göz daxili təzyiqi yüksək olan insanlarda qlaukomanın inkişaf ehtimalını azaltmağa kömək edə bilər. Bu, xəstəlik üçün əsas risk amillərindən biri hesab olunur. Alimlər təxminən 3 min xəstənin məlumatlarını təhlil etdikdən sonra belə nəticəyə gəliblər. 

HİT.az xəbər verir ki, tədqiqatın nəticələri “JAMA Ophthalmology” jurnalında dərc olunub.

Tədqiqatçılar göz daxili təzyiqi yüksək olan 2920 insanın məlumatlarını araşdırıblar. İştirakçılar iki qrupa bölünüb: birinci qrup nikotinamid qəbul edib, ikinci qrup isə qəbul etməyib.

Təxminən dörd il davam edən müşahidə müddətində B3 vitamini qəbul edən qrupdakı xəstələrin 3,5 faizində, müqayisə qrupundakı iştirakçıların isə 9 faizində qlaukoma inkişaf edib.

Nikotinamid qəbulu qlaukoma riskinin təxminən 66 faiz azalması ilə əlaqələndirilib. Bundan əlavə, vitamin qəbul edən insanlarda əlavə müalicə üsullarına ehtiyac daha az olub: göz təzyiqini azaltmaq üçün damcılardan vitamin qəbul edən iştirakçıların 13,6 faizi, nəzarət qrupunun isə 21,2 faizi istifadə edib. Lazer müalicəsi isə bu qrupda iki dəfədən çox daha az tətbiq olunub.

Alimlər hesab edirlər ki, qoruyucu təsir nikotinamidin hüceyrələrin enerji istehsalı üçün vacib olan NAD koenziminin səviyyəsinə təsiri ilə bağlı ola bilər. Yaş artdıqca bu maddənin ehtiyatları azalır və nəticədə torlu qişa ilə görmə siniri hüceyrələri zədələnmələrə qarşı daha həssas olur.

Tədqiqatçıların fikrincə, B3 vitamini bu toxumalarda enerji mübadiləsini dəstəkləyə və onların davamlılığını artıra bilər.

Bununla belə, araşdırmanın müəllifləri qeyd ediblər ki, əldə olunan nəticələr hələ nikotinamidin standart müalicəni əvəz edə biləcəyi və ya qlaukomadan müstəqil profilaktika vasitəsi kimi istifadə edilə biləcəyi anlamına gəlmir. Effektivliyi təsdiqləmək və təhlükəsiz dozaları müəyyənləşdirmək üçün əlavə klinik tədqiqatlara ehtiyac var.

Samir