Dizlərdə və digər oynaqlarda yağışdan əvvəl yaranan ağrılar sadəcə özünütəlqinlə bağlı olmaya bilər. Bu hal orqanizmin hava dəyişikliklərinin üç amilinə — temperatur, rütubət və atmosfer təzyiqinə reaksiyası ilə əlaqəli ola bilər. Bu barədə Hindistanda yerləşən San-Parmanan xəstəxanasının ortoped həkimi Anuca Ceyna bildirib. 

HİT.az xəbər verir ki, mütəxəssisin sözlərini “The Times of India” nəşri yayıb.

Həkimin sözlərinə görə, hava dəyişikliklərinə xüsusilə osteoartrit və qığırdaq toxumalarının zədələndiyi digər oynaq xəstəliklərindən əziyyət çəkən insanlar daha çox reaksiya göstərirlər. Belə hallarda xarici mühitdə baş verən kiçik dəyişikliklər belə ağrı hisslərini gücləndirə bilər.

Yağış adətən bir neçə amilin eyni vaxtda dəyişməsi ilə müşayiət olunur: atmosfer təzyiqinin azalması, rütubətin artması və havanın soyuması. Bu amillərin hər biri oynaqların vəziyyətinə təsir göstərə bilər.

Təzyiqin azalması zamanı oynaqların ətrafındakı toxumalar bir qədər genişlənə və sinir uclarına düşən təzyiqi artıra bilər. Bu isə ağrı və ya narahatlıq hissinə səbəb ola bilər.

“Temperaturun aşağı düşməsi də xoşagəlməz hissləri gücləndirə bilər: əzələlər daha gərgin olur, oynaqların hərəkətliliyi azalır və hərəkətlər sərtliklə müşayiət oluna bilər”, deyə mütəxəssis izah edib.

Həkim ağrıların artmasının başqa səbəbi kimi pis hava şəraitində fiziki aktivliyin azalmasını da göstərib. İnsan daha az hərəkət etdikdə oynaqları dəstəkləyən əzələlər zəifləyir və oynaqlar yükə qarşı daha həssas ola bilər.

Bununla yanaşı, mütəxəssislər qeyd edirlər ki, havaya reaksiya fərdi xüsusiyyət daşıyır. Bəzi insanlarda atmosfer şəraitinin dəyişməsi həqiqətən ağrıya səbəb ola bilər, digərləri isə hava ilə oynaq vəziyyəti arasında heç bir əlaqə hiss etmirlər.

Samir