Gözün torlu qişasının görüntüsü insanın əslində nə qədər sürətlə qocaldığını, yəni pasport yaşından fərqlənə bilən bioloji yaşını göstərə bilər. On minlərlə görüntü əsasında öyrədilmiş neyroşəbəkə gözün görüntüsü ilə yaşı 2,5–2,7 il dəqiqliklə qiymətləndirir. 

HİT.az xəbər verir ki, araşdırmanın nəticələri “GeroScience” jurnalında dərc olunub.

Seul Milli Universitetinin alimləri torlu qişanın təxminən 30 min görüntüsündən istifadə ediblər. Onların təxminən 29,5 mini 7535 nəfərdən əldə edilib və süni intellekt həmin məlumatların bir hissəsi əsasında öyrədilib. Daha sonra sistem müstəqil seçmə üzərində sınaqdan keçirilib. Metod “retinal yaş fərqi” adlandırılıb: əgər “gözün yaşı” insanın real yaşından çoxdursa, bu, orqanizmin sürətlənmiş qocalmasına işarə edə bilər.

Torlu qişanın üstünlüyü ondadır ki, qan damarlarını və sinir toxumasını cərrahi müdaxilə olmadan birbaşa görmək mümkün olan yeganə nahiyədir. Məlum olub ki, “gözün yaşı” sağlamlıq vəziyyətinə həssasdır: diabet bu göstəricini orta hesabla 2,52 il, katarakta 1,86 il, yaşla bağlı makula degenerasiyası 0,6 il, siqaret çəkmək isə təxminən yarım il artırıb.

Alimlər vurğulayırlar ki, eyni pasport yaşına malik insanlar çox fərqli sürətlə qocalırlar. Buna genlər, həyat tərzi və ətraf mühit təsir göstərir. Hazırda metod ayrı-ayrı insanlar üçün dəqiq proqnoz verməkdən daha çox böyük qruplardakı tendensiyaları qiymətləndirmək üçün əlverişlidir.

Bununla belə, bu yanaşma qocalma prosesini izləmək üçün sadə və qeyri-invaziv üsula doğru mühüm addım hesab olunur. Oftalmoloq müayinəsi zamanı onsuz da çəkilən adi göz görüntüsü gələcəkdə orqanizmin ümumi vəziyyətinin göstəricisinə çevrilə və hansı problemlərə əvvəlcədən müdaxilə etməyin lazım olduğunu müəyyənləşdirməyə kömək edə bilər.

Bioloji yaş təqvim yaşından fərqli olaraq orqanizmin nə dərəcədə “köhnəldiyini” göstərən qiymətləndirmədir. Eyni gündə doğulan insanlar üçün təqvim yaşı eyni olsa da, bioloji yaş fərqli ola bilər. Alimlər uzun müddətdir ki, bioloji yaşı müəyyən etməyin sadə üsullarını axtarırlar — qan, dəri və beyin fəaliyyətinin göstəriciləri əsasında müxtəlif yanaşmalar araşdırılır.

Bu baxımdan göz xüsusilə əlverişlidir: torlu qişanın müayinəsi ağrısızdır, cəmi bir neçə dəqiqə çəkir və artıq rutin göz müayinəsinin bir hissəsidir. Buna görə də gələcəkdə bu metodun adi tibbi müayinələrə asanlıqla inteqrasiya edilməsi mümkündür.

Samir