Saniyədə 1 terabit sürətə çatacağı gözlənilən yeni nəsil 6G şəbəkələri divar və şüşə kimi maneələrlə qarşılaşdıqda ciddi problemlər yaşayır. Kaliforniyadan olan mühəndislər isə bu problemə 3D printerlə hazırlanan passiv plitələr vasitəsilə həll təklif ediblər. Sistem siqnalları maneələrin ətrafından əks etdirərək əhatə dairəsini iki dəfəyə qədər genişləndirir.

HİT.az xəbər verir ki, saniyədə 1 terabit sürətə çatacağı proqnozlaşdırılan 6G texnologiyası qapalı məkanlarda gözlənilməz maneə ilə qarşılaşır. Millimetr dalğa uzunluğundakı elektromaqnit spektrindən istifadə edən yeni nəsil şəbəkələr yüksək məlumat ötürmə sürəti təmin etsə də, fiziki maneələri keçməkdə çətinlik çəkir.

Hazırda istifadə etdiyimiz Wi-Fi, 4G və 5G tezlikləri divarlardan nisbətən rahat keçə bildiyi halda, 6G siqnalları mebel və ya şüşə ilə qarşılaşdıqda zəifləyir və əlaqə kəsilə bilir. San-Dieqo Kaliforniya Universitetinin mühəndisləri isə siqnalı maneənin içindən keçirmək əvəzinə onun ətrafından yönləndirən yeni üsul hazırlayıblar.

“FlowForm” adlandırılan yeni sistem 3D printer vasitəsilə hazırlanan, ölçüsü 15 santimetr olan xüsusi plitələrdən ibarətdir. Siqnalı yönləndirən panellərin iş prinsipi olduqca sadədir. Üzərindəki minlərlə kiçik struktur sayəsində daxil olan siqnalları passiv şəkildə istənilən istiqamətə əks etdirir.

Sistem üçün elektrik kabelinə, enerji mənbəyinə və ya proqram təminatı yeniləməsinə ehtiyac yoxdur. Plitələri tavana və ya divara asanlıqla quraşdırmaq və dərhal istifadəyə vermək mümkündür.

Sistem kiçik çayların birləşərək böyük çaya çevrilməsi prinsipinə bənzər şəkildə işləyir. Otaqlar arasında yayılan zəif əsas siqnal zənciri ikinci dərəcəli axınlar vasitəsilə əhatə dairəsini birbaşa insanların olduğu nöqtələrə doğru genişləndirir.

Sahə sınaqları zamanı passiv panellərin məlumat ötürmə sürətini demək olar ki, iki dəfə artırdığı, çətin “ölü zonalarda” isə əhatə dairəsini iki dəfədən çox genişləndirdiyi müəyyənləşib. Hərəkətdə olan istifadəçiləri saniyələr ərzində aşkar edən mövcud giriş nöqtələri ilə tam inteqrasiya olunan sistem fasiləsiz bağlantı təmin edir.

Bir ədədinin qiyməti minlərlə dollar olan aktiv elektron panellərlə eyni performansı göstərən bu plitələrin istehsal xərci isə cəmi 2 dollar civarındadır.

2030-cu illərdə həyatımıza daxil olması gözlənilən 6G şəbəkələri üçün bu aşağı xərcli həll qapalı məkanlarda əhatə dairəsi problemini aradan qaldıra bilər.

Samir