Telefon, kompüter və digər elektron cihazların üzərində müxtəlif kiçik simvollar yer alır. Onların arasında üzərindən xətt çəkilmiş zibil qutusu işarəsi xüsusi əhəmiyyət daşıyır. Bu nişan cihazın istifadə müddəti başa çatdıqdan sonra məişət tullantıları ilə birlikdə atılmamalı olduğunu göstərir.

HİT.az xəbər verir ki, sözügedən işarə Avropa İttifaqının Elektrik və Elektron Avadanlıq Tullantıları (WEEE) direktivi ilə əlaqəlidir. Simvol elektron cihazların ayrıca toplanmalı və xüsusi qaydada təkrar emal edilməli olduğunu bildirir.

Elektron tullantıların adi zibildən ayrı toplanmasının əsas səbəblərindən biri onların tərkibində müxtəlif qiymətli materiallarla yanaşı, ətraf mühit və insan sağlamlığı üçün təhlükə yarada biləcək maddələrin olmasıdır. Buna görə də köhnə telefon, kompüter və digər elektronikanı nə məişət zibilinə, nə də adi təkrar emal qutularına atmaq məsləhət görülür.

İstifadə müddəti başa çatmış cihazların elektron tullantıların qəbulu üzrə ixtisaslaşmış məntəqələrə təhvil verilməsi daha düzgün yanaşmadır. Bəzi mağazalar və texnologiya şirkətləri də köhnə cihazların geri qaytarılması və ya dəyişdirilməsi üçün xüsusi proqramlar təqdim edir.

Xüsusilə batareyası şişmiş, daxili hissələri üzə çıxmış və ya yanğın riski yaradan şəkildə zədələnmiş cihazlarla ehtiyatlı davranmaq lazımdır. Belə məhsulların adi toplama məntəqələrinə atılması əvəzinə, onlar üçün nəzərdə tutulmuş xüsusi tullantı mərkəzlərinə müraciət edilməlidir.

Elektron cihazların üzərindəki simvollar məhsulun istehsal olunduğu və satıldığı ölkədən asılı olaraq dəyişə bilər. Bu nişanlar enerji səmərəliliyi, elektrik təhlükəsizliyi, elektromaqnit uyğunluğu, sertifikatlaşdırma və təkrar emal tələbləri barədə məlumat verir.

Məsələn, FCC ABŞ Federal Rabitə Komissiyasının, EAC Avrasiya Gömrük İttifaqının uyğunluq sertifikatını göstərir. CE işarəsi Avropa İttifaqının uyğunluq nişanıdır. UL təhlükəsizlik, CCC Çin məcburi sertifikasiyası, KC isə Cənubi Koreyanın uyğunluq işarəsi kimi istifadə olunur.

Bu simvollar ilk baxışda adi istehsalçı etiketləri kimi görünsə də, cihazın hansı texniki, təhlükəsizlik və ekoloji tələblərə cavab verdiyini müəyyənləşdirmək baxımından əhəmiyyətlidir.

Xüsusilə üzərindən xətt çəkilmiş zibil qutusu işarəsi cihazın ömrü başa çatdıqda onun düzgün tullantı kanalına yönləndirilməsinin vacibliyini göstərir. Bu qaydaya əməl edilməsi həm elektron tullantıların düzgün idarə olunmasına, həm də ətraf mühitin qorunmasına kömək edir.

Samir