İspaniyanın mərkəzində yerləşən bir şəhər ekspertlər tərəfindən ölkənin ən az qiymətləndirilən turizm istiqamətlərindən biri hesab olunur. Söhbət qayalıqlar üzərində yerləşən memarlığı ilə seçilən Kuenka şəhərindən gedir. 

HİT.az xəbər verir ki, bu barədə “Adevarul.ro” yazır.

Şəhər dar, kub daşlarla döşənmiş küçələri və XII əsrə aid qotik kafedralı ilə tanınır. Bu kafedral İspaniyada tikilən ilk belə memarlıq nümunələrindən biri hesab olunur.

Şəhərin ən məşhur simvollarından biri isə “asılı evlər” adlanan kompleksdir. Bu evlər sanki uçurumun üzərində yerləşir.

Kuenkanın tarixi mərkəzi UNESCO-nun Dünya irsi siyahısına daxildir. Onun orta əsr atmosferi müasir incəsənət obyektləri ilə də zənginləşdirilib. Burada yerləşən “İspan abstrakt incəsənət muzeyi” müasir əsərləri tarixi bina ilə kəskin kontrastda təqdim edir.

Şəhərin yaxınlığında “Sehrli şəhər” adlanan təbii geoloji formasiya da mövcuddur. Təxminən 90 milyon il yaşı olan qayalardan ibarət bu ərazi qeyri-adi formaları ilə həm geologiya həvəskarlarını, həm də turistləri cəlb edir.

“Ziyarətçilər üçün Kuenka həm də qeyri-adi yaşayış imkanları təqdim edir. Keçmiş monastır dörd ulduzlu otelə çevrilib və köhnə şəhərə mənzərə açır. Digər otellər isə daş divarları və yerli mətbəxi ilə bölgənin kənd üslubunu qoruyub saxlayır”, deyə nəşrdə qeyd olunur.

Baxmayaraq ki, Kuenka kütləvi turizm istiqaməti deyil, ora Madriddən asanlıqla çatmaq mümkündür və buna görə də şəhər tez-tez birgünlük səfərlər üçün seçilir.

Samir