Alimlər müasir Liviyanın ərazisində 7 000 il əvvəl yaşamış iki qadının genetik kodunu araşdırıblar və nəticələr sensasion olub. Məlum olub ki, bu insanlar əvvəllər elmə məlum olmayan, on minlərlə il tam təcrid şəraitində mövcud olmuş ayrıca bir xəttə aid olublar. 

HİT.az xəbər verir ki, bu barədə "DailyGalaxy" nəşri məlumat yayıb.

Materialda qeyd olunur ki, tapıntı Takarori qaya sığınacağında aşkar edilib. O dövrdə Sahara çaylar və göllərlə zəngin yaşıl savanna olsa da, yerli əhali qonşu icmalarla qarışmayıb.

Maraqlıdır ki, bu insanlar maldarlıqla məşğul olmağı bacarırdılar, lakin miqrant deyildilər. Alimlərin fikrincə, onlar sadəcə bu təcrübəni qonşu xalqlardan mənimsəyiblər.

"Nature" jurnalında dərc olunan yeni tədqiqatda ətraflı izah edilən bu nəticə, Yaşıl Saharanın miqrasiya dəhlizi rolunu oynadığı barədə əvvəlki təsəvvürləri təkzib edir.

Maks Plank adına Təkamül Antropologiyası İnstitutunun genetik alimi Yohannes Krauze "Reuters" agentliyinə müsahibəsində bildirib:

"Bu göstərir ki, onlar maldarlıq kimi – Afrikadan kənarda yaranmış mədəni yeniliyi mənimsəsələr də, genetik baxımdan təcrid olunmuş vəziyyətdə qalıblar".

Qeyd olunur ki, bu nəsil təxminən 5 000 il əvvəl, Sahara yenidən quraqlaşdıqda yoxa çıxıb.

Bu qadınların genetik təcridi onların bütün mövcudluğu boyunca qorunub saxlanılıb. Neandertal mənşəyi analiz edilərkən alimlər yalnız iz səviyyəsində – genomun təxminən 0,15 faizi qədər pay aşkar ediblər. Bu, Afrikadan kənar populyasiyalarla müqayisədə on dəfə azdır.

Maks Plank İnstitutunun tədqiqatçısı Nada Salem vurğulayıb: "Bu kəşf göstərir ki, maldarlıq Yaşıl Sahara boyunca, ehtimal ki, kütləvi miqrasiya ilə deyil, mədəni mübadilə vasitəsilə yayılıb".

Samir