Cənubi Amerikada yaşayan anakondalar dünyanın ən qorxulu yırtıcılarından sayılır, lakin “anakonda” adı altında bir neçə fərqli növ birləşir. Onların ən məşhurları yaşıl və sarı anakondadır və bu iki növ arasında ciddi fərqlər var. 

HİT.az xəbər verir ki, bu barədə "BBC Wildlife" yazır.

Yaşıl anakonda Yer üzündəki ən böyük və ən ağır ilan hesab olunur. Yetkin dişilər 8,8 metrdən çox uzunluğa, təxminən 250 kiloqram çəkiyə və 30 santimetrdən artıq bədən diametrinə çata bilər.

Uzunluq baxımından şəbəkəli piton onu keçsə də, kütləsinə görə yaşıl anakonda bütün müasir ilanlar arasında rekordçudur.

Sarı anakonda isə daha kiçik ölçülüdür. Adətən 3,7 metrə qədər böyüyür, iri dişilər isə 4,6 metrə çata bilər. Çəkisi əsasən 25–35 kiloqram arasında olur.

İki növü fərqləndirmək üçün əsas əlamət rəngdir:

* yaşıl anakonda zeytun-yaşıl rəngdə olub tünd ləkələrlə örtülür, qarın hissəsində qara və sarı pulcuqlar olur;
* sarı anakonda isə daha açıq, sarımtıl rəngdədir və üzərində tünd qəhvəyi və ya qara ləkələr və zolaqlar var. Quyruğun alt hissəsindəki naxış hər fərd üçün fərqlidir.

Su mühitinin ustaları

Hər iki növ yarımsu həyat tərzi keçirir və əsasən Cənubi Amerikanın bataqlıqlarında, su basmış ərazilərində yaşayır. Onlar əla üzür və su altında bir neçə dəqiqə qala bilirlər.

Ağır bədəninə görə yaşıl anakonda quruda ləng hərəkət etsə də, suda çox sürətli və təhlükəli yırtıcıya çevrilir.

Onların ovuna çöl donuzları, marallar, quşlar, tısbağalar, kaymanlar və hətta yaquarlar daxil ola bilər. Bütün anakondalar kimi, onlar zəhərli deyil, qurbanlarını güclü sıxma (konstiktsiya) ilə öldürür.

Anakondalar insana hücum edə bilərmi?

Filmlərdəki qorxulu obrazlarına baxmayaraq, anakondalar insanlar üçün nadir hallarda təhlükə yaradır.

Tədqiqatçılara görə, yaşıl anakondanın insanı yediyini təsdiqləyən etibarlı sənədli hadisə yoxdur. Bununla belə, onun çənələri nəzəri olaraq yetkin insanın çiyinlərini belə əhatə edə biləcək qədər genişdir.

Samir