Ukrayna orta mənzilli pilotsuz uçuş aparatlarından geniş şəkildə istifadəni artıraraq Rusiya ordusunun təchizat və logistika infrastrukturuna zərbələr endirir. Hərbi analitiklərin qiymətləndirməsinə görə, bu, müharibənin dinamikasını dəyişən əsas amillərdən birinə çevrilib və Rusiya ordusu üçün ciddi çətinliklər yaradıb.

HİT.az xəbər verir ki, bu barədə “The New York Times” yazıb.

Cəbhə xəttinin milyonlarla dronla “doydurulmasından” sonra Ukrayna əməliyyatları dərinləşdirərək əvvəlcə Rusiya neft-qaz infrastrukturuna, daha sonra isə əsas logistika marşrutlarına yönəlib.

Kiyev “qızıl orta” adlandırılan hədəflərə fokuslanıb — cəbhədən 150 km-dən uzaq yerləşən yollar və dəmir yolları vasitəsilə aparılan təchizat zəncirləri. Ukrayna tərəfi bu əməliyyatları “logistik bloklama” kimi təsvir edir.

Avstraliyalı istefada olan general Mik Rayanın sözlərinə görə, bu mərhələ Rusiyaya ən çox zərər verən dövrdür: “Bax, bu, ruslara həqiqətən zərər verir”.

Onun fikrincə, koordinasiyalı zərbələr Rusiyanın hücum tempini artırmasını çətinləşdirir.

Ukrayna rəsmiləri bildirirlər ki, ölkə pilotsuz uçuş aparatlarının istehsalını kəskin artırıb. Məlumata görə, Ukrayna ayda 5000-dən çox orta və uzaq məsafəli zərbə həyata keçirmək qabiliyyətinə malikdir.

Müdafiə naziri Mixaylo Fedorovun sözlərinə görə, may ayında 50 km-dən uzaq məsafələrə edilən zərbələrin sayı aprel ayı ilə müqayisədə iki dəfə artıb.

“DeepState” analitik qrupunun məlumatına görə, 2023-cü ildən bəri ilk dəfə may ayında Rusiya xalis ərazi itkisi ilə üzləşib.

Baş Qərargah rəisi Oleksandr Sirski bildirib ki, Ukrayna may ayında itirdiyindən təxminən 60 kvadrat km daha çox ərazi geri qaytarıb.

Müharibə Araşdırmaları İnstitutu (ISW) qeyd edir ki, bu zərbələr münaqişəni yeni mərhələyə keçirə bilər və Ukrayna üçün məhdud zamanlı “unikal imkan” yaradır.

Analitiklər xəbərdarlıq edirlər ki, Ukraynanın bu üstünlükdən istifadə etməsi üçün vaxt məhduddur. Britaniya Kral Birləşmiş Xidmətlər İnstitutundan Cek Votlinq bildirib ki, müharibə qırılma nöqtəsinə çatıb və bu, atəşkəs üçün təzyiq yaratmaq imkanı verə bilər.

Ukrayna komandirləri də sürətli hərəkətin vacibliyini vurğulayırlar. Dron bölməsinin komandiri “Kit” deyib: “Əsas ideya odur ki, Rusiya müharibəni hiss etsin və məsafənin təhlükəsizlik təmin etmədiyini anlasın”.

Ukrayna qüvvələri təkmilləşdirilmiş mühərriklər, batareyalar, Starlink rabitə sistemləri və süni intellekt elementləri olan modern dronlardan istifadə edir. 

Bu zərbələr əsasən zirehsiz yük maşınlarını və dəmir yolu eşelonlarını hədəf alır və nəticədə:

* Rusiya bölmələrində yanacaq çatışmazlığı
* qoşun rotasiyalarının çətinləşməsi
* cəbhədə aktivliyin azalması

Ukrayna həmçinin dron istehsalını sürətlə artırır. 2024-cü ildə şirkətlərdən biri 112 zərbə dronu üzrə müqavilə alıb, sonrakı müqavilə isə 25 000 orta və uzaq məsafəli dronu əhatə edir.

Avropa ölkələri Ukraynada dron istehsalı üçün 1,63 milyard dollar ayırıb. Bundan əlavə, hökumət “logistik bloklama” proqramına 113 milyon dollardan çox vəsait yönəldir.

Ən böyük nəticələr Ukraynanın cənubunda müşahidə olunur. Ukrayna qüvvələri Krıma aparan logistika marşrutlarının bəzi hissələrinə nəzarət etdiyini bildirir, o cümlədən Rusiyanın quru dəhlizi adlandırılan əraziyə.

Yeganə alternativ marşrut Kerç körpüsüdür və bu obyekt artıq bir neçə dəfə hücuma məruz qalıb.

Analitiklərin ümumi qənaətinə görə, Ukrayna müharibənin yeni mərhələsinə keçib və burada ucuz, kütləvi dronlar həlledici rol oynayır. ISW bunu döyüşlərin xarakterini dəyişə biləcək “unikal imkan” kimi qiymətləndirir.

Samir