Niderlandda (Hollandiya) uşaqlar, valideynlər və müəllimlər ildə bir dəfə piyada gəzinti festivalında iştirak edirlər. 

Hit.az “The Guardian”a istinadən xəbər verir ki, bu ənənə həqiqətən də uşaqların həyatını dəyişə bilər.

Məqalədə bildirilir ki, yağış belə holland uşaqlarını dayandırmayıb. Güclü tufan və xoşagəlməz hava proqnozuna baxmayaraq, saat 17:00-da yüzlərlə uşaq – çoxu velosipedlə – valideynləri ilə birlikdə Amsterdamın Vesterparkına toplaşıb.

“Yağmurluq geyinmiş uşaqlar 5 və ya 10 kilometrlik marşrutla məhəllə ətrafında yürüşə hazırlaşırlar”, deyə məqalədə bildirilir.

Bu tədbir “Avondvierdaagse” (sözün hərfi mənası “dörd günlük axşam yürüşü”) adlanır və könüllülər tərəfindən təşkil olunur.

Bu yarış deyil, lakin uşaqlar dörd gün ardıcıl marşrutu keçsələr, medal, çiçək dəstəsi və bəzən şirniyyat alırlar.

Bu ənənə təkcə Amsterdamda deyil, ölkənin hər yerində keçirilir. Hər il yayın əvvəlində yüz minlərlə holland uşaq dostları və valideynləri ilə birlikdə dörd axşam boyunca öz yaşayış məhəllələrini kəşf edir.

Bu tədbirin müxtəlif versiyaları hətta Surinama da yayılıb. “Royal Dutch Walking Association”ın məlumatına görə, hər il 700 məkanda təxminən 500 min insan bu yürüşlərdə iştirak edir.

Tədbir əvvəlcə 1909-cu ildə hərbi məşq kimi başlamışdı, daha sonra isə müxtəlif şəhərlərdə geniş yayılmış yürüşlərə çevrilib.

Məqalədə qeyd olunur ki, bu gün “Avondvierdaagse” dünyanın ən böyük piyada tədbirlərindən biridir və 80-dən çox ölkədən on minlərlə iştirakçı cəlb edir.

Uşaqlara yol boyu verilən ənənəvi şirniyyat – yarım portağal və nanəli konfet də bu tədbirin bir hissəsidir.

Tədqiqatçılar hesab edirlər ki, bu ənənə uşaqlarda fiziki aktivliyi və açıq havada vaxt keçirməyi təşviq edir.

Mütəxəssislərin fikrincə, uşaqların dostları ilə birlikdə belə tədbirlərdə iştirak etməsi onların sosial əlaqələrini gücləndirir və psixoloji rifahına müsbət təsir göstərir.

“Dostlarla vaxt keçirmək çox əyləncəlidir”, deyə 10 yaşlı iştirakçı bildirib.

Bununla belə, bəzi tənqidçilər tədbirin inklüzivliyi ilə bağlı suallar qaldırırlar.

Samir