Alimlər kainatın niyə bu qədər səssiz göründüyünü izah edə biləcək yeni nəzəriyyə irəli sürüblər. Araşdırmaya görə, uzaq ulduzların yaratdığı kosmik hava hadisələri yad sivilizasiyalardan gələn siqnalları təhrif edərək onların aşkar edilməsini çətinləşdirə bilər.

HİT.az xəbər verir ki, səmaya baxarkən hiss etdiyimiz dərin boşluq bəşəriyyətin kainatda tək olduğunun sübutu olmaya bilər. Onilliklərdir Yer kürəsindən kənar ağıllı həyatın göndərəcəyi mənalı siqnalları gözləyən alimlər bəlkə də kosmik səs-küy içində zəif bir pıçıltını eşitməyə çalışırlar.

Yeni tədqiqat göstərir ki, kosmosdakı müxtəlif proseslər və ulduzların yaratdığı kosmik hava şəraiti yad sivilizasiyaların texnoloji siqnallarını tanınmaz vəziyyətə sala bilər.

1950-ci illərdə fizik Enriko Fermi tərəfindən səsləndirilən məşhur “Hamı haradadır?” sualı bu gün də elm dünyasının ən böyük müəmmalarından biri olaraq qalır. "The Astrophysical Journal" jurnalında dərc olunan yeni araşdırma bu paradoksa fərqli izah təklif edir.

Tədqiqatçıların fikrincə, ulduzların ətrafında yaranan sıx plazma buludları və yüklü hissəcik axınları uzaq məsafələrdən gələn texnoloji siqnalları genişləndirərək onların aşkarlanmasını çətinləşdirir. Nəticədə siqnalın enerjisi daha geniş tezlik diapazonuna yayılır.

Başqa sözlə, alimlər kəskin və aydın bir “fit səsi” axtardıqları halda, kainat onlara artıq təhrif olunmuş və qarışıq “səs-küy toplusu” göndərmiş ola bilər.

Astronomlar bu günə qədər Yer kürəsindən kənar həyatın izlərini tapmaq üçün əsasən darzolaqlı radio siqnallarına diqqət yetiriblər. Bu tip siqnallar yalnız bir neçə herslik diapazonda cəmləşdiyi üçün təbii kosmik mənbələrin yaratdığı mürəkkəb siqnallardan asanlıqla seçilə bilir.

Lakin "SETI" İnstitutunun tədqiqatçıları məsələyə fərqli yanaşıblar. Komanda keçmişdə Marsa göndərilmiş kosmik aparatların məlumatlarını təhlil edərək, onların siqnallarının kosmik fırtınalar səbəbindən necə dəyişdiyini modelləşdirib.

Süd Yolunda geniş yayılmış M-tipli cırtdan ulduzlar üzərində aparılan modelləşdirmə göstərib ki, siqnallar planetlərarası mühitdə ciddi şəkildə bulanıqlaşır və yayılır.

Əldə olunan nəticələrə əsasən, mütəxəssislər hesab edirlər ki, hazırkı axtarış metodları kainatın real fiziki şəraiti ilə tam uyğun gəlməyə bilər. Gələcək nəsil teleskoplar siqnal genişlənməsini nəzərə alan yeni axtarış meyarlarından istifadə etdikdə, bəlkə də bəşəriyyət uzun illərdir axtardığı ilk yadplanetli siqnalını aşkar edə biləcək.

Samir