Madaqaskarın tropik meşələrində kiçik, lakin olduqca qeyri-adi bir canlı yaşayır – şeytani yarpaqquyruq gekkon (*Uroplatus phantasticus*). Görünüşü və rəngi sayəsində o, çürümüş quru yarpağı demək olar ki, mükəmməl şəkildə təqlid edir və meşə döşənəyində bir anın içində gözdən itə bilir.
HİT.az xəbər verir ki, bu barədə "Discover Wildlife" yazır.
Şeytani yarpaqquyruq gekkon kamuflyaj ustası hesab olunur. Onun yarpaq formasında olan quyruğu hətta kənarları qopmuş çürük yarpağa bənzəyir və bu, sürünənin ətraf mühitə daha yaxşı uyğunlaşmasına imkan verir.
Onun latınca adı da maraqlı məna daşıyır. "Uroplatus" sözü yunan dilində "quyruq" və "yastı" mənasını verən iki sözün latınlaşdırılmış formasıdır. "Phantasticus" isə latınca "xəyali", "möhtəşəm" mənasını verir və bu canlının qeyri-adi görünüşünü əks etdirir.
Gekkon "şeytani" adını əsasən gözlərinin üstündə yerləşən buynuza bənzər çıxıntılara görə alıb.
Bu növ yalnız Madaqaskar adasında yaşayır və endemik hesab olunur.
Növ ilk dəfə 1888-ci ildə Belçika-İngiltərə mənşəli zooloq Corc Albert Bulencer tərəfindən təsvir edilib. O, elmi fəaliyyəti ərzində 2 mindən çox yeni heyvan növünü təsvir edib və onlara elmi ad verib.
Şeytani yarpaqquyruq gekkonlar əsasən meşə döşənəyində yaşayır və adətən yerdən 3 metrdən yüksək qalxmırlar.
Yetkin fərdlərin uzunluğu, quyruq da daxil olmaqla, təxminən 9 santimetrə çatır.
Onların xallı qəhvəyi rəngi və yarpağı xatırladan quyruğu Madaqaskar meşələrində görünmədən yaşamağa imkan verir.
Digər gekkonların əksəriyyəti kimi, bu növün də göz qapaqları yoxdur. Gözlərini qoruyan şəffaf pərdə mövcuddur. Gekkon gözlərini nəm saxlamaq və tozdan təmizləmək üçün onları dili ilə yalayır.
Şeytani yarpaqquyruq gekkon gecə həyat tərzi keçirir və əsasən həşəratlarla qidalanır.
Kamuflyajdan başqa, o, yırtıcılardan qorunmaq üçün başqa üsullardan da istifadə edir. Məsələn, kölgəsini kiçiltmək üçün bədənini yastılaşdıra, parlaq qırmızı ağız boşluğunu nümayiş etdirmək üçün ağzını geniş aça və təhlükə zamanı quyruğunu qopara bilir.
Bu gekkonlar həmçinin yüksək səslər çıxararaq yırtıcıları çaşdırmağa çalışırlar.
Digər sürünənlər kimi, onlar da yumurta qoyaraq çoxalırlar.
Qidalarının əsas hissəsini cırcıramalar, güvələr və digər həşəratlar təşkil etsə də, onların təbii şəraitdə qidalanması barədə hələ də çox az məlumat mövcuddur.
Samir
