Müasir təyyarədaşıyan gəmilərin nəhəng uçuş göyərtələri ilk baxışda adi hava limanlarındakı beton və ya asfalt örtüyünü xatırlatsa da, əslində onlar tamamilə xüsusi təyinatlı poladdan hazırlanır.
HİT.az xəbər verir ki, bu barədə "SlashGear" nəşri yazıb.
Məqalədə qeyd olunur ki, bu göyərtələrin istehsalında adi poladdan deyil, həm döyüş şəraiti, həm də gündəlik intensiv istismar üçün hazırlanmış yüksək möhkəm dəniz tipli poladdan istifadə edilir.
Bundan əlavə, uçuş göyərtəsinin poladı yüksək temperaturlara davam gətirməsi və həm təyyarələr, həm də gəmidə xidmət edən şəxsi heyət üçün sürüşməyən səth yaratması məqsədilə xüsusi emaldan keçirilir.
Hərbi dəniz aviasiyasının ilk dövrlərində bir çox təyyarədaşıyan gəmidə uçuş göyərtələri polad əvəzinə taxta lövhələrdən hazırlanırdı. Lakin İkinci Dünya müharibəsindən etibarən zirehli polad göyərtələr standart həllə çevrilib.
Polad göyərtələr yalnız gəmini və onun anqarında saxlanılan təyyarələri düşmən hücumlarından qorumaqla kifayətlənmir, həm də gəminin ümumi daşıyıcı konstruksiyasının mühüm hissəsini təşkil edir. Uçuş göyərtəsinin qalınlığı gəmidən-gəmiyə fərqlənsə də, bu göstəricilər adətən məxfi saxlanılır.
Gəmiqayıranlar göyərtənin həm sərt dəniz şəraitinə tab gətirməsi, həm də müxtəlif hava şəraitində təyyarələrin təhlükəsiz eniş və qalxışını təmin etməsi üçün əlavə mühəndislik həllərindən istifadə edirlər.
Bu məqsədlə polad göyərtə xüsusi sürüşməyə qarşı örtüklə örtülür. Bu örtük həm konstruksiyanı yüksək temperatur və digər yüklənmələrdən qoruyur, həm də yüksək sürtünmə əmsalına malik səth yaradaraq təyyarələrin, texnikanın və ekipaj üzvlərinin sürüşməsinin və ya göyərtədən dənizə düşməsinin qarşısını alır.
Sürüşməyə qarşı örtük müəyyən istismar müddətindən sonra yenilənməlidir və onun xidmət müddəti istifadə olunan materialdan, eləcə də məruz qaldığı yüklənmədən asılıdır.
Məqalədə bildirilir ki, ABŞ Hərbi Dəniz Qüvvələrinə məxsus "USS Gerald R. Ford" təyyarədaşıyan gəmisində 2017-ci ildə istismara verildikdən sonra ilk dəfə 2025-ci ildə sürüşməyə qarşı örtük tam yenilənib və müasirləşdirilib. Bu işlər ümumilikdə üç həftə davam edib.
Samir
