Yunanıstan və Albaniya sərhədində yerləşən mağarada alimlər indiyədək qeydə alınmış ən böyük hörümçək torlarından birini aşkar ediblər. Təxminən 106 kvadratmetr sahəni əhatə edən bu nəhəng torun 111 minə yaxın hörümçək tərəfindən toxunduğu ehtimal edilir.

HİT.az xəbər verir ki, kəşf Yunanıstanın şimalından girişə malik, lakin dərin hissələri Albaniya ərazisinin altında uzanan Kükürd mağarasında həyata keçirilib. Sarandaporo çayının əhəngdaşı qayalarını aşındırması nəticəsində yaranmış bu mağarada kükürd tərkibli təbii bulaqlar mövcuddur və burada özünəməxsus ekosistem formalaşıb.

Tədqiqatçıların bildirdiyinə görə, tor tək bir növə aid deyil. Genetik analizlər onun təxminən 69 min ev hörümçəyi və 42 mindən çox "Prinerigone vagans" növünə məxsus fərdlər tərəfindən yaradıldığını göstərib.

Araşdırma müəllifləri qeyd edirlər ki, normal şəraitdə təbiətdə qarşılıqlı əlaqəyə girməyən bu iki növün ilk dəfə belə böyük ortaq koloniya qurduğu müşahidə olunub.

Mağarada günəş işığı olmadığından ekosistem fotosintez deyil, kimyəvi reaksiyalar hesabına enerji istehsal edən kemosintez prosesinə əsaslanır. Kükürdü sevən bakteriyaların yaratdığı selikli təbəqə kiçik milçək sürfələrinin əsas qida mənbəyidir. Bu milçəklər isə mağarada yaşayan yüz minlərlə hörümçəyin əsas ovunu təşkil edir.

Alimlər qeyd edirlər ki, torun ən sıx hissəsinin məhz çay milçəklərinin ən çox toplandığı divar sahəsində yerləşməsi təsadüfi deyil.

Təbiətdə təkbaşına çox böyük torlar qura bilən digər hörümçək növləri də mövcuddur. Onlardan ən məşhuru Madaqaskarda yaşayan Darvin qabıq hörümçəyidir. Bu növ kiçik ölçülü olmasına baxmayaraq, su hövzələri üzərində 25 metrə qədər uzunluqda tor toxuya bilir.

Bununla belə, Kükürd mağarasında aşkarlanan bu tor müxtəlif növlərin birgə fəaliyyəti nəticəsində yaranmış ən böyük məlum hörümçək konstruksiyalarından biri hesab olunur və alimlərin fikrincə, növlərarası əməkdaşlığın nadir nümunəsidir.

Samir