Təyyarə bileti bron etmək cəmi bir neçə dəqiqə çəkir. Lakin oturacaq seçiminə gəldikdə, bir çox sərnişin ilk boş yeri seçməklə kifayətlənir. Halbuki düzgün seçilmiş oturacaq səyahəti xeyli rahat edə, hətta uçuşdan sonrakı əhvalınıza belə təsir göstərə bilər. 

HİT.az xəbər verir ki, bu barədə "Glamour" nəşri bələdçi heyətinin üzvünün tövsiyələrinə istinadən yazıb.

“Əgər məndən bir neçə saat davam edən adi reys üçün hansı yeri seçəcəyimi soruşsalar, çox güman ki, qanaddan ön tərəfdə, təyyarənin ilk üçdəbir hissəsində əyləşərdim. Bunun bir neçə səbəbi var. Birincisi, bu hissə adətən təyyarənin arxa hissəsindən daha sakit olur. İkincisi, enişdən sonra təyyarəni daha tez tərk etmək mümkündür. Bu isə xüsusilə qısa transferi olan və ya keçiddə uzun müddət növbə gözləmək istəməyən sərnişinlər üçün rahatdır”, deyə mütəxəssis bildirib.

Onun sözlərinə görə, bir neçə cərgənin fərq yaratmadığını düşünənlər yanılırlar. Çünki eyni anda 180–300 sərnişin təyyarəni tərk etdikdə, hər cərgə əlavə bir neçə dəqiqə vaxt qazandıra bilər. Bundan başqa, ön hissədə turbulensiya adətən daha az hiss olunur. Buna görə də uçuş zamanı sarsıntıdan narahat olanlara ön tərəfdə yer seçmək tövsiyə edilir.

Pəncərə kənarı, yoxsa keçid tərəfi?

Bu, sərnişinlərin ən çox verdiyi suallardan biridir. Bələdçi heyətinin üzvünün sözlərinə görə, pəncərə kənarındakı yer uçuş zamanı yatmağı sevənlər üçün idealdır. Belə yerlərdə başınızı divara söykəmək mümkündür və qonşunuz ayağa qalxanda hər dəfə yerinizdən durmağa ehtiyac qalmır. Üstəlik, pəncərədən görünən mənzərə də əlavə üstünlükdür.

Bununla yanaşı, uçuş zamanı tez-tez ayağa qalxan, gəzməyi və ya uzun müddət eyni vəziyyətdə oturmağı sevməyən sərnişinlər üçün keçid tərəfdəki yer daha münasib hesab olunur.

“Əgər digər sərnişinlərlə məcburi ünsiyyətdən narahat olursunuzsa, keçid tərəfdə əyləşmək daha rahat seçim ola bilər. Bu halda istədiyiniz zaman yerinizdən qalxa bilərsiniz”, deyə o əlavə edib.

Fövqəladə çıxış yanındakı yerləri seçməyə dəyərmi?

Fövqəladə çıxış sıralarında ayaqlar üçün xeyli geniş yer olur. Bu xüsusilə uzunboylu sərnişinlər üçün mühüm üstünlükdür. Lakin hər kəs bu yerlərdə əyləşə bilməz.

“Fövqəladə çıxış cərgəsində əyləşən sərnişin zərurət yaranarsa, ekipaja kömək etməyə hazır olmalıdır. Buna görə də kiçik uşaqla səyahət edənlər, hərəkət məhdudiyyəti olanlar, ingilis dilini kifayət qədər bilməyənlər və ya sağlamlıq vəziyyətinə görə bu vəzifəni yerinə yetirə bilməyəcək şəxslər başqa yerə keçirilə bilərlər”, deyə məqalədə bildirilir.

Arxa hissə həmişə pis seçim deyil

Bir çox sərnişin instinktiv olaraq təyyarənin arxa hissəsindən qaçmağa çalışır. Halbuki bunun da müəyyən üstünlükləri var. Əgər reys tam dolmayıbsa, arxa sıralarda boş yerlərin qalması ehtimalı daha yüksəkdir. Bu da daha geniş yer əldə etməyə, hətta bütöv bir cərgədə tək əyləşməyə imkan verə bilər.

Bəzi aviaşirkətlərdə yemək və içkilərin paylanmasına məhz arxa hissədən başlanılır. Belə hallarda arxada əyləşən sərnişinlər xidməti ilk alanlar olur. Bundan əlavə, istifadə olunmuş qabların yığılması da bəzən arxa hissədən başladığı üçün sərnişinlər uzun müddət gözləməli olmurlar.

Ən əlverişsiz oturacaqlar

Mütəxəssislər oturacaq seçərkən tualetlərin yerini əvvəlcədən yoxlamağı tövsiyə edirlər. Səbəb təkcə mümkün qoxular deyil. Tualetlərin yaxınlığında daim insanların hərəkəti olur, qapılar tez-tez açılıb-bağlanır və sərnişinlər burada söhbət etmək üçün dayanırlar. Bu isə sakit istirahəti çətinləşdirir.

Həmçinin arxasında başqa cərgə olmayan oturacaqlar da daha az rahat hesab edilir. Belə oturacaqların arxalığı ya ümumiyyətlə geriyə əyilmir, ya da çox az hərəkət edir. Bu isə uzunmüddətli uçuşlarda ciddi narahatlıq yarada bilər.

Samir