Şimali Koreyanın nüvə sınaqları keçirdiyi ərazidə son illərdə seysmik aktivliyin kəskin artdığı müəyyənləşdirilib. Araşdırma nəticələri yeraltı nüvə partlayışları ilə bölgədə baş verən zəlzələlər arasında mümkün əlaqəyə diqqət çəkib.

HİT.az xəbər verir ki, Cənubi Koreyanın Pusan Milli Universiteti və Çinin Çendu Texnologiya Universitetinin alimləri Şimali Koreyanın Punggye-ri nüvə sınaq poliqonunda baş verən prosesləri araşdırıblar.

Tədqiqat zamanı 2008-ci ildən etibarən qeydə alınmış seysmik dalğa məlumatları təhlil edilib. Nəticədə nüvə sınaqlarının keçirildiyi Mantap dağı ətrafında zəlzələlərin sayında nəzərəçarpacaq artım müşahidə olunub.

Araşdırmaya əsasən, xüsusilə 2017-ci ildə Şimali Koreyanın son nüvə sınağından sonra seysmik aktivlik daha da güclənib. Həmin vaxtdan etibarən ərazidə ümumilikdə **1330 zəlzələ** qeydə alındığı bildirilib.

Alimlər qeyd ediblər ki, 2017-ci ildən əvvəlki nüvə sınaqlarından sonra baş verən təkanların böyük hissəsi qısa müddətli olub. Sonrakı dövrdə isə zəlzələlərin həm tezliyi, həm də gücü artıb.

Tədqiqatçılar bu göstəricilərin nüvə sınaqları nəticəsində yeraltı strukturlarda yaranan dəyişikliklərlə əlaqəli ola biləcəyini bildiriblər. Bununla belə, söhbət araşdırmanın ortaya qoyduğu mümkün əlaqədən gedir və nəticələrin elmi baxımdan qiymətləndirilməsi davam edir.

Qeyd edək ki, Şimali Koreya 2006-cı ildən etibarən nüvə sınaqlarını Punggye-ri poliqonunda həyata keçirib. Ölkə 2006, 2009, 2013 və 2017-ci illərdə bir dəfə, 2016-cı ildə isə iki dəfə nüvə sınağı keçirib.

Samir