ABŞ sahillərində bu yay köpək balıqlarının sayı kəskin artıb. 

HİT.az xəbər verir ki, "Gizmodo"nun məlumatına görə, alimlər bunu okean suyunun temperaturunun yüksəlməsi ilə əlaqələndirirlər. İstiləşmə səbəbindən yırtıcılar daha sərin sular axtararaq adi miqrasiya yollarını dəyişir və daha şimala doğru hərəkət edirlər.

Son onillik ərzində dünya okeanının temperaturu dəfələrlə rekord həddə çatıb. ABŞ Milli Okean və Atmosfer Administrasiyasının (NOAA) məlumatına görə, okean istixana qazlarının tullantıları səbəbindən toplanan artıq istiliyin 90 faizindən çoxunu udur.

Köpək balıqları soyuqqanlı heyvanlar olduğuna görə, həddindən artıq isti su onlar üçün əlverişli deyil. Buna görə də bir çox növlər ABŞ-ın şərq sahilləri boyunca yaşayış areallarını genişləndirərək şimala doğru köçməyə məcbur olur.

Çimərliklərə gələnlər məşhur istirahət məkanlarında, xüsusilə Nyu-York ştatındakı Rokavey-Biç çimərliyində köpək balıqlarının görünməsi ilə bağlı çoxsaylı xəbərdarlıqlar alıblar. Təkcə bu çimərlikdə may ayının sonundan iyulun əvvəlinədək 23 köpək balığı müşahidəsi qeydə alınıb. Onlardan 16-sı iyulun ilk həftəsinə təsadüf edib.

Yırtıcıların aktivliyi səbəbindən Nyu-York ştatının məşhur çimərlikləri müvəqqəti olaraq istirahət edənlər üçün bağlanıb. Vəziyyətə nəzarət etmək üçün park polisi sahil sularında patrul aparan və köpək balıqlarını vaxtında aşkar etməyə kömək edən dronlardan istifadə edir.

Oxşar vəziyyət Kaliforniya sahillərində də müşahidə olunur. Okeanın istiləşməsi səbəbindən burada getdikcə daha çox gənc ağ köpək balığı şimala doğru hərəkət edərkən qeydə alınır. Videolardan birində bodibordinq edən şəxsin yaxınlığında gənc ağ köpək balığının sudan sıçradığı da görüntülənib.

Okeanın sürətlə istiləşməsi bir çox dəniz növünü daha sərin suların olduğu qütblərə yaxın ərazilərə köçməyə məcbur edir.

Belə nümunələrdən biri uzunluğu 3,6 metr, çəkisi isə təxminən 450 kiloqram olan dişi ağ köpək balığıdır. O, ilk dəfə iyun ayında Nyu-York ştatının Montauk sahillərində müşahidə edilib. Dəniz tədqiqat təşkilatı "OCEARCH"ın məlumatına görə, köpək balığı Atlantik okeanının Kanada sularına doğru qeyri-adi marşrutla hərəkət edir.

Oxşar yolu "Kontender" adlı başqa bir ağ köpək balığı da seçib. Onun uzunluğu 4,2 metrdən çoxdur və bu, onu Atlantik okeanında peyk izləmə cihazları ilə işarələnmiş ən iri köpək balıqlarından birinə çevirir.

Aprel ayında dərc olunan araşdırma göstərib ki, Atlantik kütburun köpək balıqları da suyun istiləşməsi səbəbindən davranışlarını dəyişirlər. Onlar balalarını böyütmək üçün istifadə etdikləri sahilyanı "uşaq bağçası" ərazilərini ABŞ-ın şərq sahilləri boyunca daha şimala köçürməyə başlayıblar. Bu ərazilərdə su temperaturu balaların inkişafı üçün daha uyğundur.

Miqrasiya marşrutlarının dəyişməsi səbəbindən insanlar əvvəllər nadir hallarda rast gəlinən yerlərdə köpək balıqlarını daha tez-tez görə bilərlər. Bununla belə, mütəxəssislər vurğulayırlar ki, bu, mütləq mənfi xəbər deyil.

Çünki köpək balıqları dəniz ekosistemlərinin mühüm hissəsidir və onların tarazlığının qorunmasına kömək edir.

"Köpək balığı populyasiyaları uzun müddət həddindən artıq ov səbəbindən azalıb. Buna görə də onların sayının artması bu növlərin bərpasından xəbər verə bilər", deyə köpək balıqları üzrə tədqiqatçı Nil Hammerslaq "NewsNation Morning in America" proqramının efirində bildirib.

Ekspertlər həmçinin xatırladırlar ki, insanlar köpək balıqlarının təbii qidası deyil. Statistik baxımdan ildırım vurması nəticəsində həyatını itirmək ehtimalı köpək balığının ölümcül hücumuna məruz qalmaq ehtimalından qat-qat yüksəkdir. Mütəxəssislərin hesablamalarına görə, ölümcül hücum riski təxminən 3,7 milyon insana bir hadisə təşkil edir.

Tədqiqatçıların sözlərinə görə, hazırda bütün köçəri quş növlərinin yarıdan çoxunun sayı insan fəaliyyəti ilə bağlı təhlükələrin birgə təsiri nəticəsində azalır. Milyardlarla köçəri quşun sağ qalması müxtəlif ölkələrdə yerləşən təbii ərazilər şəbəkəsindən asılıdır.

Əsas təhlükələr arasında təbii yaşayış yerlərinin itirilməsi, invaziv növlər, binalarla toqquşmalar, ovçuluq, qanunsuz ticarət, zəhərli pestisidlərdən istifadə və balıqçılıq torlarında quşların tələf olması göstərilir.

Samir