Hindistanda bank əməkdaşı Surac Kumar həyat yoldaşı Utranı zəhərli kobranın köməyi ilə öldürməkdə təqsirli bilinib. İstintaqın versiyasına görə, kişi cinayəti əvvəlcədən planlaşdırıb və məqsədi həyat yoldaşının cehizinə və sığorta ödənişinə çıxış əldə etmək olub.

HİT.az xəbər verir ki, əlilliyi olan Utra daha əvvəl də zəhərli ilanın hücumuna məruz qalıb. 2020-ci ilin martında onu gürzə sancıb. Bundan sonra qadın uzun müddət müalicə alıb və valideynlərinin evində bərpa olunub. Daha sonra qadını ikinci dəfə ilan sancıb — bu dəfə kobra. Hindistanlı qadın ertəsi gün dünyasını dəyişib. Sonradan sürünən heyvan otaqda tapılıb və öldürülüb.

Mərhumun yaxınları iki oxşar hadisədən şübhələnərək polisə müraciət ediblər. İstintaq nəticəsində müəyyən edilib ki, Surac ilan ovçusundan iki zəhərli ilan alıb və onlardan həyat yoldaşına qarşı hücumlarda istifadə edib.

İş materiallarına əsasən, ikinci hücumdan əvvəl kişi Utraya yuxu dərmanı verib, daha sonra kobranı otağa buraxıb. İttiham tərəfinin məlumatına görə, sürünəni daha aqressiv etmək üçün o, ilanı bir neçə gün ac saxlayıb.

İstintaqçılar həmçinin müəyyən ediblər ki, qadının ölümündən qısa müddət əvvəl onun adına həyat sığortası rəsmiləşdirilib, qızıl zinət əşyalarının bir hissəsi isə yoxa çıxıb. Daha sonra polis rezin plantasiyasında gizlədilmiş 38 ədəd zinət əşyası aşkar edib. İş üzrə Suracın qohumları da əmlakın gizlədilməsi və sübutların məhv edilməsində şübhəli bilinərək araşdırmaya cəlb olunublar.

Məhkəmə Kumarın qətldə təqsirli olduğuna qərar verərək onu ömürlük həbs cəzasına məhkum edib.

Samir