ABŞ Prezidenti Donald Tramp Las-Veqasda çıxışı zamanı elektromobilləri sərt tənqid edib və onların sahiblərinin müəyyən növ “xəstəlikdən” əziyyət çəkdiyini bildirib. 

HİT.az xəbər verir ki, bu barədə "Electrek" portalı məlumat yayıb.

Amerika lideri bildirib ki, guya amerikalıları 2030-cu ilə qədər elektromobillərə keçməyə məcbur edən “elektrikli nəqliyyat mandatını” ləğv edib. O, həmçinin sürücülərin akkumulyatorun yaxınlıqdakı enerji doldurma məntəqəsinə çatmadan boşalacağından qorxması kimi tanınan “gediş məsafəsi narahatlığı” anlayışını da ələ salıb.

“Batareya cəmi dörddə üç boşalanda narahat olmağa başlayırlar. Elə bil onlarda hansısa xəstəlik var, onlar sadəcə dəlidirlər”, deyə Tramp bildirib.

O, həmçinin statistikaya istinad edərək ABŞ-da yeni avtomobil bazarının yalnız 7%-ni elektromobillərin təşkil etdiyini və bunu tələbatın olmadığının sübutu kimi qiymətləndirib.

Lakin "Electrek" qeyd edir ki, ABŞ-da federal səviyyədə heç vaxt elektromobillərə “məcburi keçid” mövcud olmayıb. Söhbət avtomobil istehsalçılarını elektrik avtomobilləri istehsal etməyə təşviq edən daha sərt ekoloji standartlardan gedib. Bu normalar alıcıları heç nəyə məcbur etməyib.

Bundan əlavə, ekspertlərin fikrincə, Trampın qeyd etdiyi “gediş məsafəsi narahatlığı” problemi bu gün sürətli enerji doldurma şəbəkələrinin inkişafı və qalan məsafəni dəqiq hesablayan sistemlər sayəsində demək olar ki, aktuallığını itirib.

Nəhayət, ABŞ-da elektromobillərin aşağı payı qismən Tramp administrasiyasının siyasətinin nəticəsi kimi göstərilir. Belə ki, administrasiya 2025-ci ilə qədər qüvvədə olan elektromobil alışına görə 7,5 min dollar məbləğində federal vergi güzəştini ləğv edib.

Bundan əvvəl məlum olmuşdu ki, yerli avtomobil markası "Tenet" öz "T8" krossoverinin yeni modifikasiyasını təqdim edib. Əvvəllər model yalnız yeddi yerlik, üç sıra oturacaqlı versiyada mövcud idisə, indi alıcılara ön ötürücülü beş yerlik variant da təklif olunacaq. Yeni modelin istehsalı Kaluqadakı "AGR" zavodunda tam dövr üzrə həyata keçiriləcək.

Samir