Mütəxəssislər bildirirlər ki, hotellərdə qonaqlar üçün nəzərdə tutulmuş birdəfəlik gigiyena vasitələrini otaqdan çıxararkən özləri ilə aparmaq mümkündür. 

HİT.az xəbər verir ki, "Daily Mail"in yazdığına görə, bu əşyalar məhz birdəfəlik istifadə üçün nəzərdə tutulduğundan sonrakı səfərlərdə də faydalı ola bilər.

Hoteldən hansı əşyaları götürmək olar?

"Hotels.com"un səyahət eksperti Melani Fiş bildirib ki, ümumi qayda sadədir: hər yeni qonaq üçün yenilənən əşyaları götürmək olar.

Onun sözlərinə görə, bunlara aşağıdakılar daxildir:

* birdəfəlik gigiyena vasitələri;
* çay və qəhvə paketləri;
* birdəfəlik otaq başmaqları;
* qonaqlar üçün təqdim olunan kiçik hədiyyə və dəstlər.

"Pan Pacific London" hotelinin əməkdaşı Enn Qolden də qeyd edib ki, birdəfəlik istifadə üçün təqdim olunan qulluq vasitələrini və qarşılama dəstlərini götürmək normal hesab olunur.

Mütəxəssislərin sözlərinə görə, otaqda istifadə olunmamış çay və qəhvə paketlərini də aparmaq olar, çünki hotel əməkdaşları növbəti qonaq üçün onları yenisi ilə əvəz edirlər.

Hansı əşyaları götürmək olmaz?

Ekspertlər xəbərdarlıq edirlər ki, növbəti qonaq üçün otaqda qalmalı olan əşyaları götürmək olmaz. Bunlara daxildir:

* xalatlar;
* dəsmallar;
* yastıq və yataq dəstləri;
* fen;
* asılqanlar;
* çaydan;
* qab-qacaq;
* televizor pultu.

Məqalədə qeyd olunur ki, xalatlar hotellərdən ən çox oğurlanan əşyalardan biridir. Xüsusilə brend xalatların qiyməti 200 ABŞ dollarından çox ola bilər və onların götürülməsi əlavə ödənişə səbəb ola bilər.

Melani Fiş bildirib ki, əgər əşya növbəti qonağın istifadəsi üçün nəzərdə tutulubsa, o, otaqda saxlanılmalıdır. Əks halda, hotel qonağın hesabına həmin əşyanın dəyərini əlavə edə bilər.

Araşdırmalara əsasən, Avropada hotel rəhbərlərinin böyük əksəriyyəti otaqlardan dəsmalların itdiyini bildirib. "Forbes"in istinad etdiyi başqa bir araşdırmada isə hotel əməkdaşlarının təxminən üçdə biri yastıqların yoxa çıxması halları ilə qarşılaşdıqlarını qeyd edib.

Mütəxəssislər vurğulayırlar ki, bu cür əşyaların götürülməsi oğurluq hesab olunur və onların dəyəri qonaqdan tələb edilə bilər.

Samir