Böyük Britaniyada aparılan araşdırma britaniyalı ailələrin üçdə birinin valideynlərin ailəvi səfərlərin pulunu ödəməyi heç vaxt dayandırmamalı olduğunu düşündüyünü göstərib. Xüsusilə Z nəslinin nümayəndələri ailəvi tətil xərclərinin 52 faizini valideynlərin qarşılamalı olduğunu düşünürlər və bu, artıq praktikada da baş verir.

Qaynarinfo xəbər verir ki, jurnalist Lüsi Kavendişin “The Independent” üçün yazdığına görə, bir neçə nəslin birlikdə tətilə çıxması getdikcə populyarlaşır. Son dörd illə müqayisədə tətilə gedən britaniyalıların sayı iki dəfədən çox artıb.

“Mən bir çox cəhətdən tamamilə şoka düşdüm. Kimsə, xüsusən də övladlarının 20 və ya 30 yaşlarında olduğu halda, ailəsini necə tətilə apara bilər? Niyə kimsə bunu gözləməlidir? Hamının hazırda maddi çətinlik çəkdiyi bir vaxtda valideynlər niyə tətil xərclərini ödəməlidirlər? Məgər “ana və ata bankı” nə vaxtsa bağlanmamalıdır? Əksər valideynlərin övladlarının xərclərini davamlı olaraq ödəməsi, xüsusən də onlar artıq uşaq olmadıqda, sadəcə mümkün deyil”, deyə o vurğulayıb.

Onun sözlərinə görə, problem övladlarının işləməməsində deyil. Onlar işləyirlər, lakin maaşları yaşayış xərclərinin artım tempinə çatmır. Bundan əlavə, onlar kirayə xərclərinə qənaət etmək və ya gələcəkdə mənzil almaq üçün pul yığmaq məcburiyyətindədirlər.

“Mənim sosial şəbəkə lentim təkcə dostlarımın, müxtəlif influenserlərin və məşhurların yetkin övladları ilə birlikdə necə tətil etdiklərini göstərən fotolarla dolu deyil. Mən həmçinin çoxlu sayda insan tanıyıram ki, onlar tətilə yalnız yetkin övladları ilə deyil, övladlarının partnyorları, bəzən isə nəvələri ilə birlikdə gedirlər”, deyə Kavendiş bildirib.

Jurnalist onlardan belə səfərlərə necə maddi imkan tapdıqlarını soruşanda, əsasən tətili özlərinin maliyyələşdirdiyini deyiblər.

"Ana və ata bankı” bu təzyiqə güclə tab gətirir. Mən isə tək ana olduğum üçün yalnız “ana bankıyam”. Buna görə də ad günü səfərimin nə qədər baha başa gələcəyini anlayanda bu planı təxirə salmalı oldum". 

"Bunun əvəzinə yerli pabda birlikdə şam yeməyi yeyəcəyik. Bu, o qədər də dəbdəbəli deyil və sosial şəbəkələrdə paylaşmaq üçün fotolarımız olmayacaq. Amma düşünürəm ki, hamımızın nəyə imkanımız çatdığını, nəyə isə çatmadığını realist şəkildə qiymətləndirməyin vaxtıdır”, deyə Kavendiş fikrini yekunlaşdırıb.

Samir