ABŞ-ın Florida Universitetinin tədqiqatçıları yüksək duz konsentrasiyası olan mühitdə yaşayan yerüstü halofil mikroorqanizmlərin Marsın səthinin altındakı ehtimal edilən şəraitdə aktiv şəkildə inkişaf edə biləcəyini müəyyən ediblər. 

HİT.az xəbər verir ki, tədqiqatın nəticələri bioRxiv preprint serverində dərc olunub.

Alimlər yüksək duzluluğa malik sularda, o cümlədən Ölü dəniz üçün xarakterik şəraitdə yaşaya bilən Haloferax volcanii arxeyasını araşdırıblar. Tədqiqatçılar yüksək duzluluq, aşağı təzyiq, həmçinin Marsda aşkar edilmiş kimyəvi birləşmələr olan perxlorat və nitratların mövcudluğunun birləşdiyi şəraitdə bu mikroorqanizmin inkişaf edib-etməyəcəyini yoxlayıblar.

Təcrübə zamanı mikroblar 1 litrində 225 qram duz olan suda, 21 dərəcə Selsi temperaturunda və 24 millibar təzyiq altında 160 gün ərzində yetişdirilib. Aşağı təzyiqdə inkişaf daha yavaş getsə də, alimlər mikroorqanizmlərin aktiv şəkildə çoxaldığını göstərən əlamətlər qeydə alıblar. Mühit bulanıqlaşıb, mikroblar nitrat və perxloratları bərpa edib. Bundan əlavə, elektron mikroskopiyası biofilmin əmələ gəldiyini göstərib.

Tədqiqatçılar vurğulayırlar ki, təcrübə Marsda həyatın mövcud olduğunu sübut etmir. Alimlər hələlik planetin səthinin altında maye duzlu su cibləri aşkar etməyiblər və təcrübədə istifadə olunan şərait Marsdakı vəziyyətə yalnız qismən uyğun gəlir. Xüsusilə mikroorqanizmlər qida mənbəyi kimi maya ekstraktı ilə təmin ediliblər, halbuki müasir Marsda belə qida mənbəyinin mövcudluğu müəyyən edilməyib.

Alimlər növbəti mərhələdə halofil mikroorqanizmlərin Mars üçün xarakterik olan daha aşağı temperatur və təzyiq şəraitində inkişaf edə bilib-bilməyəcəyini yoxlamağı planlaşdırırlar. Tədqiqatçılar həmçinin bakteriyaların hüceyrələrini qurması və sərt şəraitdə inkişaf etməsi üçün hazır karbon mənbəyi kimi asetatdan (sirkə turşusunun duzundan) istifadə etməyi nəzərdə tuturlar.

Samir