İngiltərənin Kent qraflığındakı Çiddinqstoun qəsri yaxınlığında yerləşən göl güclü istilər səbəbindən qismən quruyub və nəticədə dibində təxminən iki əsrdir su altında qaldığı ehtimal edilən qədim qılınc aşkarlanıb.

HİT.az xəbər verir ki, bu barədə "Metro" məlumat yayıb.

Könüllülər gölü tökülmüş budaqlardan təmizləyərkən metal əşya görüblər. Qılıncı qarmaq vasitəsilə sudan çıxarmaq mümkün olub. Tapıntı qəsrin kuratoru Naomi Kollikə təhvil verilib. O, mütəxəssislərlə birlikdə silahın mənşəyini müəyyənləşdirməyə çalışır.

Qılınc əfsanəvi Kral Arturun silahına bənzədilərək artıq «Kent Ekskaliburu» adlandırılıb. İlkin versiyaya görə, tapıntı XIX əsrin əvvəllərinə aid mərasim qılıncı və hərbi orkestr musiqiçisinin silahı ola bilər.

Gölün özü 1800-cü illərdə yaradılıb. Buna görə tədqiqatçılar qılıncın orada 200 ildən çox qala bilməyəcəyini düşünürlər.

Qılıncın ən yaxşı qorunmuş hissəsi üzərində ucunda şir təsviri olan qızılı rəngli dəstəyidir. Onun ehtimal ki, latundan hazırlandığı bildirilir. Əyri tiyə isə qalın pas və göl lilinin təbəqəsi ilə örtülüb.

Hazırda qəsrin əməkdaşları tapıntını xüsusi turşusuz kağızda saxlayır və ona yalnız əlcəklə toxunurlar.

Qılıncın mənşəyi ilə bağlı başqa versiyalar da var. Bir vaxtlar qəsr soyuq silahlar da toplayan sənət taciri və kolleksiyaçı Denis Eyr Bauerə məxsus olub. Buna görə qılıncın onun kolleksiyasından olması ehtimal edilir. Digər versiyaya görə isə silah İkinci Dünya müharibəsi zamanı burada yerləşdirilən hərbçilər tərəfindən göldə qoyulub.

Samir