Rusiya Böyük Britaniyanı "Ukrayna böhranını qəsdən gərginləşdirməkdə" ittiham edib. 

HİT.az xəbər verir ki, bu açıqlama Ukraynanın Rusiya ərazisindəki hədəflərə zərbələr endirmək üçün Britaniya istehsalı pilotsuz uçuş aparatlarından istifadə etdiyinin təsdiqlənməsindən sonra verilib.

"Beləliklə, Birləşmiş Krallıq qanlı cinayətlərin və terror aktlarının iştirakçısı və əlbirinə çevrilir. Londonun hərəkətləri qaçılmaz olaraq nəticələrə səbəb olacaq və bunun üçün o, cavab verməli olacaq", deyə Rusiya səfirliyinin Böyük Britaniyadakı bəyanatında deyilir.

Rusiya diplomatları həmçinin xəbərdarlıq ediblər ki, London Ukraynaya nə qədər çox yardım göstərsə, "ödəyəcəyi qiymət bir o qədər yüksək olacaq".

Moskvanın Londona xəbərdarlığı Rusiyaya qarşı Ukraynanın həyata keçirdiyi bir sıra zərbələrdən sonra səslənib.

Böyük Britaniya Müdafiə Nazirliyinin nümayəndəsi Rusiyanın təhdidlərinə cavab olaraq ölkəsinin Ukraynanın "çiyin-çiyinə" yanında olduğunu bildirib.

"Rusiyada hökumətimizin Ukraynada Rusiya təcavüzünə qarşı çıxmaq əzmində heç bir şübhə olmamalıdır", deyə nazirlik nümayəndəsinin bəyanatında deyilir.

Britaniya Müdafiə Nazirliyi ölkənin "Ukraynanı Putinin qanunsuz işğalından müdafiə etmək üçün ona zəruri avadanlıqların verilməsinə sadiq olduğunu" da vurğulayıb.

Hərbi mənbə BBC-yə bildirib ki, Britaniya istehsalı pilotsuz uçuş aparatlarından Rusiyaya qarşı hücumlarda istifadə olunub. Mənbənin sözlərinə görə, bu zərbələr təxminən 44 milyard dollar həcmində iqtisadi zərərə səbəb olub.

Rusiya Xarici İşlər Nazirliyinin sözçüsü Mariya Zaxarova da Britaniya dronlarının Rusiya ərazisindəki hədəflərə, o cümlədən Rostov vilayətinin Kamenski rayonunda yerləşən yanacaq anbarına hücum zamanı istifadə edildiyini bildirib.

Samir