Merkuri planeti alimlərin əvvəl düşündüyündən daha sürətlə kiçilə bilər. Yeni araşdırmaya əsasən, planetin diametri təxminən 23 kilometr azalıb ki, bu da əvvəlki hesablamalardan 30 faiz çoxdur.

HİT.az xəbər verir ki, Almaniya Kosmik Tədqiqatlar Mərkəzinin alimləri bildiriblər ki, Merkurinin kiçilməsi onun daxili hissələrinin soyuması ilə bağlıdır. Günəş sisteminin ən kiçik və Günəşə ən yaxın planeti olan Merkuri təxminən 4,5 milyard il əvvəl formalaşdıqdan sonra tədricən soyuyur. Böyük dəmir nüvənin soyuması planetin nüvəsi ilə yanaşı, mantiya və qabığın da sıxılmasına səbəb olur.

Bu proses Merkurinin səthində qırışlara və tektonik çatlara bənzər strukturların yaranması ilə nəticələnir. Alimlər NASA-nın “Messenger” kosmik aparatından əldə olunan məlumatları planetin səthinin yeni xəritələri ilə müqayisə edərək bu strukturları araşdırıblar.

Tədqiqatçılar müəyyən ediblər ki, Merkurinin daha nahamar ərazilərində sıxılma nəticəsində yaranan izlər daha az görünür. Bunun səbəbinin meteorit toqquşmaları nəticəsində yaranan süxur qalıqlarının həmin strukturları örtməsi olduğu ehtimal edilir.

Bu amil nəzərə alındıqdan sonra alimlər Merkurinin ümumi sıxılma miqyasının əvvəlki hesablamalardan daha böyük olduğu qənaətinə gəliblər.

Araşdırmanın aparıcı müəllifi Qaku Nişiyama bildirib ki, yeni məlumatlar planetin təkamül tarixini daha yaxşı anlamağa imkan verə bilər.

Merkurinin ölçüsündəki dəyişikliklərin daha dəqiq müəyyənləşdirilməsində “BepiColombo” missiyasının da mühüm rol oynayacağı gözlənilir. Avropa Kosmik Agentliyi (ESA) və Yaponiyanın JAXA agentliyinin birgə layihəsi olan aparat planetin səthini və daxili quruluşunu daha ətraflı araşdıracaq.

Alimlər hesab edirlər ki, əldə ediləcək yeni məlumatlar yalnız Merkuri haqqında deyil, daxili hissələrinin soyuması nəticəsində tədricən sıxılan digər göy cisimləri barədə də mühüm nəticələr əldə etməyə kömək edə bilər.

Samir