Təyyarələrin üzərində və müxtəlif mexaniki hissələrində görünən qırmızı lentlər sadəcə vizual detal deyil. Onlar uçuş təhlükəsizliyində mühüm rol oynayan xəbərdarlıq vasitələrindən biridir.

HİT.az xəbər verir ki, üzərində “Remove Before Flight” (“Uçuşdan əvvəl çıxarın”) yazısı olan bu lentlər təyyarə uçuşa hazırlanarkən çıxarılmalı olan qoruyucu qurğuların və təhlükəsizlik elementlərinin yerini göstərir.

Təyyarə yerdə olarkən bəzi həssas avadanlıqlar xarici təsirlərdən qorunmaq üçün xüsusi örtüklərlə bağlanır. Məsələn, təyyarənin sürətini ölçən Pitot boruları toz və həşəratların daxil olmasının qarşısını almaq üçün qoruyucu vasitələrlə örtülür.

Bu örtük uçuşdan əvvəl çıxarılmasa, cihaz havanın təzyiqini düzgün ölçə bilməz. Nəticədə pilotun aldığı sürət məlumatları səhv ola və bu da uçuş təhlükəsizliyi üçün ciddi risk yarada bilər.

Qırmızı lentlər yalnız Pitot borularında istifadə edilmir. Təyyarənin eniş şassisinin təsadüfən hərəkətə gəlməsinin qarşısını alan təhlükəsizlik sancaqları da bu cür işarələrlə qeyd olunur. Onların parlaq rəngi texniki heyətə həmin elementlərin hələ çıxarılmadığını aydın şəkildə göstərir.

Havacılıqda bütün bu proseslər xüsusi yoxlama siyahıları (checklist) ilə də nəzarətdə saxlanılır. Lakin qırmızı lentlərin üstünlüyü ondadır ki, onlar yazılı yoxlama ilə yanaşı, fiziki və vizual xəbərdarlıq funksiyası da daşıyır.

Beləliklə, texniki heyətin həmin lenti çıxarması təkcə bir prosedurun tamamlanması deyil, qoruyucu qurğunun götürüldüyünün əyani təsdiqidir. Bu sadə sistem insan səhvlərinin qarşısını almağa və təyyarənin uçuşa tam hazır vəziyyətə gətirilməsinə kömək edir.

Samir