Həftəsonu Avropada daha bir prinsipial futbol matçı keçiriləcək.

Bu dəfə İtaliya A seriyasının nəhəngləri üz-üzə gələcək. Belə ki, "Yuventus" doğma meydanında "Milan"ı qəbul edəcək. 18 yanvarda keçiriləcək matç Bakı vaxtı ilə saat 21:00-da başlayacaq. Oyundan əvvəl "Yuventus" 34 xalla 5-ci, "Milan" isə 31 xalla 7-ci sırada qərarlaşıb. Yəni xallar baxımından da olduqca əhəmiyyətli matç olacaq.

Bəs favorit hansı komandadır?

Mövzu ilə bağlı futbol mütəxəssisi Aslan Kərimov Hit.az-a açıqlama verib. O bildirib ki, maraqlı bir oyun gözlənilir:

"Hətta bu iki komandanın yaxın keçmişdə Super Kubokdakı oyunu da həddindən artıq maraqlı keçmişdi. Düşünürəm ki, bu matç da azarkeşlərin çox xoşuna gələcək. 

Bu matçda "Yuventus"un ev sahibi kimi nisbətən qələbə qazanmaq şansı daha yüksəkdir. Lakin bu matçın bol qollu keçəcəyini gözləmirəm. İtaliya çempionatı hər zaman müdafiə oyunu ilə seçilir. Düzdür, oyunun bərabərə də bitmə ehtimalı var. Ancaq buna baxmayaraq, "Yuventus"un "Milan" qarşısında qalibiyyətə bir addım daha yaxın olduğunu düşünürəm. Mənə elə gəlir ki, onların çox az fərqlə qələbə qazanmaq ehtimalları yüksəkdir". 

Pərviz