Texas A&M Baytarlıq Təbabəti və Biomediya Elmləri Fakültəsinin mütəxəssisləri evlərimizi paylaşdığımız itlərin daxili dünyasına işıq tutan genişmiqyaslı bir araşdırma aparıb. Alimlər xaricdən sevincli və qayğısız görünən itlərin əslində çox daha mürəkkəb emosional proseslərdən keçdiyini müəyyən edib.

HİT.az xəbər verir ki, araşdırmaya görə, ev itlərinin böyük hissəsi gündəlik həyatda ciddi qorxu və stres əlamətləri ilə üzləşir. “Dog Aging Project” məlumat bazasında yer alan 43 517 itin sahibi tərəfindən doldurulan anketlər təhlil edilib və davranış reaksiyaları incələnib.

Nəticələrə əsasən, itlərin 91 faizi həyatlarının hansısa mərhələsində yüngül və ya ağır qorxu əlamətləri göstərir. Tırnaq kəsimi və ya vanna kimi xüsusi qorxu faktorları çıxarıldıqda belə bu göstərici 84 faiz olaraq qalır. Bu, demək olar ki, hər 10 itdən 8-nin sahiblərinin fərq etmədiyi anlarda belə stress yaşadığını göstərir.

İtlərdə stres reaksiyasını yaradan bir çox faktor var. Tanımadıqları insanlar, digər itlərlə ilk qarşılaşmalar, ani səs-küy, yeni əşyalar və yad mühitlər əsas səbəblər sırasındadır. Tədqiqatın rəhbəri Dr. Bonnie Beaver bildirir ki, sahiblər bu reaksiyaları tez-tez görsələr də, vəziyyətin ciddiliyini hər zaman tam dərk etmirlər.

Yüngül narahatlıq yaşayan itlər adətən göz təmasından qaçma, quyruğu aşağı salma, sızlama və ya donub qalma kimi davranışlar göstərir. Qorxu artdıqca gizlənmək və ya qaçmaq cəhdləri müşahidə olunur. Bəzi hallarda həddindən artıq qorxu itlərin divarları dişləməsi kimi davranışlara qədər gedə bilər.

Mütəxəssislər bildirir ki, bu vəziyyət nəzarətdən çıxarsa, prosesi geri çevirmək çətin olur. Davamlı stress isə itin orqanizmində xroniki gərginlik yaradır və zamanla aqressiv davranışlara səbəb ola bilər.

Qorxunun tamamilə aradan qaldırılması mümkün olmasa da, bu siqnalların erkən tanınması və düzgün müdaxilə itin həyat keyfiyyətini ciddi şəkildə yaxşılaşdırır. Davranış dəyişiklikləri müşahidə edildikdə baytar həkimə müraciət etmək tövsiyə olunur.

Samir