Meyvələr təbii şirinliyə malik olduğu üçün qan şəkərinin idarəsi məsələsində bəzən suallar yarada bilər. Lakin qramla göstərilən şəkər miqdarı orqanizmin və qan qlükozasının necə reaksiya verəcəyini təkbaşına müəyyən etmir.

Hit.az xəbər verir ki, bu barədə "Eating Well” yazır.

Müxtəlif meyvələr lif, su və karbohidrat baxımından fərqlənir və bu da şəkərin qana keçmə sürətinə təsir göstərir.

Üzüm və alma ən çox istifadə edilən meyvələrdən ikisidir və hər ikisinin öz üstünlükləri var.

Nəşr qeyd edir ki, alma adətən daha çox lif ehtiva edir (xüsusilə qabığı ilə yeyildikdə), üzüm isə orqanizmi daha yaxşı nəmləndirir və onu asanlıqla qəlyanaltılara əlavə etmək mümkündür.

Diyetoloqlar hər iki meyvənin qan şəkərinə təsir baxımından xüsusiyyətlərini izah ediblər.

Üzüm

Məqaləyə görə, üzüm qan şəkərinin normal səviyyədə saxlanmasına yönəlmiş qidalanmaya daxil edilə bilər, lakin porsiya ölçüsü burada çox önəmlidir.

ABŞ Kənd Təsərrüfatı Nazirliyinin məlumatına əsasən, 1 stəkan üzüm təxminən 27 qram karbohidrat, 23 qram təbii şəkər və 1–1,5 qram lif ehtiva edir.

Lakin üzüm kiçik və dadlı olduğu üçün onu ovuc-ovuc yemək asandır və bir porsiyanın nə vaxt bir neçə porsiyaya çevrildiyini hiss etmək çətin ola bilər.

Diyetoloq Samanta DeVito bildirib:

“Üzüm qida baxımından zəngindir, amma kiçik olduğu üçün çox tez həddən artıq yeyilə bilər. Bu onun zərərli olduğu demək deyil, sadəcə bəzi insanlar üçün porsiyaya nəzarət etmək faydalıdır.”

Qırmızı və bənövşəyi üzüm tərkibində antosianlar və resveratrol kimi polifenollar daşıyır ki, bunlar ürək-metabolik sağlamlıqla əlaqəli tədqiqatlarda araşdırılır.

Araşdırmalar göstərir ki, üzümün zülal və yağ mənbələri (məsələn, yunan yoqurtu, qoz-fındıq və ya pendir) ilə birlikdə yeyilməsi daha uzunmüddətli toxluq hissi yaradır və şəkərin qana daha stabil keçməsinə kömək edir.

Alma

Alma qan şəkərinin idarəsi üçün faydalı sayılır, çünki tərkibində karbohidrat, lif və su mövcuddur. Orta ölçülü bir alma (qabığı ilə birlikdə) təxminən 25 qram karbohidrat, 19 qram təbii şəkər və 4–5 qram lif ehtiva edir.

Lifin böyük hissəsi qabıqda olduğuna görə, almanı qabığı ilə yemək daha çox fayda verir.

Diyetoloq Serena Pratt bildirib:

“Alma tərkibində pektin adlı həll olunan lif var. Bu, mədənin boşalmasını yavaşladır və qlükozanın qana keçid sürətini azaldır.”

Pektin həzm sistemində jelə bənzər maddə yaradır və karbohidratların sorulmasını ləngidə bilər. Bu da qan şəkərinin daha yavaş yüksəlməsinə səbəb olur.

Mütəxəssislərə görə, qabıqda həm də kversetin kimi polifenollar var və bu, alma ilə bağlı ürək-metabolik faydaları artırır.

Ekspertlərin fikrincə, hər iki meyvə faydalıdır, lakin alma lif tərkibinə görə bir addım öndədir. Lif karbohidratların həzmini yavaşladaraq qlükozanın qana daha tədricən keçməsinə kömək edir.

“Bu səbəbdən qan şəkəri üzümə nisbətən daha yavaş yüksəlir”, deyə məqalədə qeyd olunur.

Samir