Visseral piy daxili orqanların ətrafında toplanan və sağlamlıq üçün risk yarada bilən yağ növüdür. Araşdırmalar onun yüksək səviyyəsinin 2-ci tip diabet, ürək-damar xəstəlikləri və digər xroniki problemlərin yaranma riskini artıra biləcəyini göstərir.

HİT.az xəbər verir ki, bu barədə "EatingWell" yazıb.

Diyetoloqların fikrincə, bunun qarşısını almaq üçün kəskin pəhrizlərə ehtiyac yoxdur. Gündəlik menyuda lif, zülal və faydalı yağlarla zəngin, mümkün qədər təbii və az emal olunmuş məhsullara üstünlük vermək daha məqsədəuyğundur.

Bu baxımdan mütəxəssislərin tövsiyə etdiyi variantlardan biri bal-sarımsaq sousunda qızılbalıq, tərəvəz və qəhvəyi düyüdən hazırlanan bir tava yeməyidir.

Lif toxluq hissini artırır

Bu yeməyin bir porsiyasında təxminən 5 qram lif var. Brokoli, bolqar bibəri, kök və qəhvəyi düyü liflə zəngin məhsullardır.

Diyetoloq Melissa Mitriyə görə, lif iltihabın azalmasına və daha uzun müddət tox qalmağa kömək edə bilər. Bu isə gün ərzində qəbul edilən ümumi kalori miqdarının azalmasına və nəticədə bədəndə, o cümlədən visseral piylərin azalmasına şərait yarada bilər.

Tərəvəzlərin rasionda artırılmasının da qarın nahiyəsində yağlanmanın azalması ilə əlaqəli olduğu bildirilir. Xüsusilə brokoli kimi xaççiçəklilər ailəsinə daxil olan tərəvəzlər sağlam qidalanmanın mühüm hissəsi hesab olunur.

Zülal əzələ kütləsini qoruyur

Yeməyin bir porsiyasında təxminən 37 qram zülal var. Qızılbalıq bu baxımdan əsas mənbələrdən biridir.

Zülal arıqlama zamanı əzələ kütləsinin qorunmasına kömək edir. Əzələ kütləsinin saxlanılması isə enerji sərfiyyatının davam etməsi baxımından əhəmiyyətlidir. Bundan başqa, zülal yağ və karbohidratlarla müqayisədə daha çox toxluq hissi yarada bilər.

Mütəxəssislər qeyd edirlər ki, bu xüsusiyyət insanın kalori defisitini qorumasını asanlaşdıra və ümumi yağ itkisinə dəstək verə bilər.

Qızılbalığın tərkibində omeqa-3 var

Qızılbalıq DHA və EPA kimi omeqa-3 yağ turşuları ilə zəngindir. Bu maddələr sağlam qidalanmanın vacib komponentlərindən hesab olunur.

Diyetoloq Aleksandriya Qardi bildirir ki, omeqa-3 yağları orqanizmdə iltihabın azalmasına və insulinə həssaslığın yaxşılaşmasına kömək edə bilər. Bu amillər isə qarın nahiyəsində visseral yağların azalması ilə əlaqələndirilir.

Bununla belə, mütəxəssislər yalnız bir məhsulun və ya bir yeməyin visseral piyləri əritmədiyini vurğulayırlar. Nəticə üçün ümumi qidalanma rejimi, fiziki aktivlik və kalori balansı mühüm əhəmiyyət daşıyır.

Bal-sarımsaq sousunda qızılbalıq necə hazırlanır?

Dörd porsiya üçün 1,5 xörək qaşığı bal, 6 diş sarımsaq, 1 xörək qaşığı zeytun yağı, 4 tikə dərisiz qızılbalıq filesi, 4 stəkan brokoli, 1 ədəd qırmızı bolqar bibəri, 3 ədəd şalot soğanı, 1 kök, yarım çay qaşığı qara istiot, yarım çay qaşığı duz, 2,5 xörək qaşığı az duzlu soya sousu, 1 xörək qaşığı düyü sirkəsi, 250 qram qəhvəyi düyü və dörddə bir stəkan duzsuz toyuq bulyonu lazımdır.

Əvvəlcə soba 200 dərəcəyə qədər qızdırılır. Bal və rəndələnmiş sarımsaq qarışdırılır. Qızılbalıq bu qarışığın bir hissəsi ilə örtülərək tavada hər iki tərəfi qızardılır.

Daha sonra eyni tavaya brokoli, bolqar bibəri, soğan və kök əlavə edilir. Tərəvəzlər bir qədər yumşaldıqdan sonra soya sousu və düyü sirkəsi əlavə olunur. Ardınca qəhvəyi düyü və bulyon tavaya tökülür.

Tava sobaya yerləşdirilir və tərəvəzlər yumşalana qədər təxminən 10 dəqiqə bişirilir. Daha sonra qızılbalığın üzərinə qalan bal-sarımsaq qarışığı çəkilir və yemək daha 6-8 dəqiqə sobada saxlanılır.

Beləliklə, lif, zülal, tərəvəz, tam taxıl və omeqa-3 yağ turşularını birləşdirən bu yemək sağlam və balanslı şam yeməyi üçün uyğun seçimlərdən biri ola bilər.

Samir