Peruda arxeoloqlar qədim Peniko şəhərinin ərazisində təxminən 3 800 il əvvələ aid ritual qurbanlıq kompleksi aşkar ediblər. 

HİT.az xəbər verir ki, bu barədə "Heritage Daily" nəşri məlumat yayıb.

Tapıntı eramızdan əvvəl təxminən 1800–1500-cü illərə aid edilən ictimai binada aparılan qazıntılar zamanı üzə çıxıb.

Ritual dəstinə ağac və sümükdən hazırlanmış 43 oyma məmulat daxildir. Onların bir hissəsinin üzərində incə naxışlar həkk olunub, digərlərində isə odun təsirinin izləri qorunub saxlanılıb. Artefaktlar arasında mifoloji varlıqlar, insanabənzər fiqurlar, o cümlədən qadın təsviri və ehtimal olunan tanrı fiqurları, həmçinin quşlar, ilanlar və qurbağa sürfələrinin təsvirləri yer alır. Bundan başqa, həndəsi və abstrakt ornamentlər də aşkarlanıb.

Arxeoloqların sözlərinə görə, bəzi əşyaların üzərində kiçik oyuqlar mövcuddur. Ehtimal edilir ki, burada vaxtilə mineral və ya yarıqiymətli daşlardan hazırlanmış əlavələr yerləşdirilib. Bu xüsusiyyət artefaktların ritual mərasimlərdə mühüm rol oynadığını göstərir.

Həmin gizli saxlanc yerində əlavə olaraq üç muncuq, üç xrizokolla parçası, "Orthalicidae" fəsiləsinə aid quru ilbizlərinin çanaqlarından hazırlanmış iki muncuq fraqmenti, heykəllər üçün nəzərdə tutulduğu güman edilən doqquz göz formalı sədəf inkrustasiyası və təyinatı hələ araşdırılan daha səkkiz kiçik əşya tapılıb.

Bütün bu artefaktlar cəmi 22 santimetr uzunluğunda kiçik bir gizli bölmədə yerləşdirilib. Saxlanc yeri xırda daşlardan düzəldilmiş yarımdairə ilə əhatə olunub və üzəri iri daşla örtülüb. Tədqiqatçılar hesab edirlər ki, belə diqqətlə hazırlanmış quruluş ictimai binanın inşası ilə əlaqədar həyata keçirilmiş məqsədli ritual mərasimin tərkib hissəsi olub.

Alimlər bu tapıntının Karal sivilizasiyasının ənənələrinin onun əsas şəhərlərinin tənəzzülündən sonra da davam etdiyini göstərən mühüm sübutlardan biri olduğunu bildirirlər.

Təxminən eramızdan əvvəl 1800-cü ildə salınmış Peniko şəhəri 19,4 hektar ərazini əhatə edir və müqəddəs Karal-Supe şəhərindən 13 kilometr məsafədə yerləşir. Burada 15 ictimai bina aşkar edilib. Tədqiqatçılar hesab edirlər ki, şəhər Peru sahillərində yaşayan icmalarla And dağları əhalisi arasında mühüm ticarət mərkəzi olub və əlaqələr Amazon bölgəsinədək uzanıb.

Araşdırma müəlliflərinin fikrincə, yeni tapılan artefaktlar materialı, oyma texnikası və təsvirlərinə görə Karal mədəniyyətinin daha qədim yaşayış məntəqələrində aşkar edilmiş əşyalarla böyük oxşarlıq təşkil edir. Bu da qurbanlıq kompleksinin Böyük İctimai Binanın tikintisinin ilkin mərhələsində onun təqdis mərasiminin bir hissəsi kimi yerləşdirildiyini göstərir.

Samir