Avropa ölkələri Rusiyadan gələn raket və hava təhdidlərinə qarşı müdafiəni gücləndirmək məqsədilə İsrailin "Davud sapandı" (David's Sling) raket əleyhinə müdafiə sistemi ilə getdikcə daha fəal maraqlanmağa başlayıb. 

HİT.az xəbər verir ki, bu barədə "Business Insider" nəşrinə yüksəkvəzifəli İsrail rəsmisi bildirib.

İsrailin Raket Əleyhinə Müdafiə Təşkilatının direktoru və baş meneceri Moşe Patel bildirib ki, ötən il ərzində təxminən 12 Avropa ölkəsi bu kompleksin alınmasına maraq göstərib.

Hazırda müqaviləni yalnız Finlandiya imzalayıb. Lakin İsrail yaxın vaxtlarda daha bir Avropa dövlətinin də rəsmi şəkildə sifariş rəsmiləşdirəcəyini gözləyir. Bununla belə, potensial alıcının adı açıqlanmayıb.

Nəşr hesab edir ki, İsrail sisteminə marağın artması Avropada təhlükəsizlik vəziyyətinin pisləşməsi, İran və onun müttəfiqlərinin İsrailə qarşı kütləvi raket hücumlarının dəf edilməsində əldə olunan təcrübə, eləcə də yüksək texnologiyalı hava hücumundan müdafiə vasitələrinin alınması zərurəti ilə bağlıdır.

Rusiyanın Ukraynaya illərlə davam edən zərbələri və Yaxın Şərqdə İranın raket hücumları qitə üçün ciddi xəbərdarlıq siqnalına çevrilib.

Bundan əlavə, İsrail sisteminə marağın artmasının səbəblərindən biri ABŞ-ın "Patriot" komplekslərinin tədarükü ilə bağlı çətinliklərdir. Ukraynada və Yaxın Şərqdəki müharibələr səbəbindən bu sistemlərə tələbat kəskin artıb.

Bununla yanaşı, "Davud sapandı" digər hava hücumundan müdafiə vasitələri ilə müqayisədə daha əlçatan və olduqca universal hesab olunur. Sistem müxtəlif təhdidlərlə mübarizə apara və böyük əraziləri qoruya bilir.

Patelin sözlərinə görə, sistem geniş imkanları birləşdirir, böyük əraziləri müdafiə edə bilir və bir sıra analoqlarla müqayisədə daha münasib qiymətə malikdir. Lakin kompleks ABŞ-la birgə hazırlandığı üçün onun hər ixracı Vaşinqtonun razılığını tələb edir.

"Davud sapandı" son üç il ərzində İsrail tərəfindən geniş şəkildə istifadə olunub. Sistem İranın və onun müttəfiqlərinin, o cümlədən Yəməndəki husilərin və Livandakı "Hizbullah" qruplaşmasının raket hücumlarının qarşısının alınmasında tətbiq edilib.

İsrail İranın ballistik raketlərini məhv etmək üçün getdikcə daha çox "Davud sapandı" hava hücumundan müdafiə sisteminə üstünlük verir. Bu texnologiya ölkəyə genişmiqyaslı hücumların dəf edilməsi zamanı böyük maliyyə vəsaitlərinə qənaət etməyə imkan verir.

İsrail Müdafiə Nazirliyinin məlumatına görə, "Davud sapandı"nın bir buraxılışı dövlət büdcəsinə 1 milyon dollara başa gəlir. Bu, böyük məbləğ olsa da, kosmosda hədəfləri məhv edən "birinci səviyyəli" "Arrow 3" sisteminin hər buraxılışı 2,5 milyon dollar tələb edir.

Sistem İsrailin "Rafael Advanced Defence Systems" şirkəti və ABŞ-ın "Raytheon" şirkətinin əməkdaşlığı nəticəsində yaradılıb. Kompleks müdafiədə mühüm boşluğu doldurur: "Dəmir günbəz" qısa məsafəli təhdidlərə qarşı işləyir, ekzoatmosferik "Arrow 3" isə yüksək hündürlüklərdəki hədəfləri məhv edir.

"Davud sapandı" isə orta və uzaq məsafələrdə hava məkanına nəzarət edən bu iki sistem arasındakı "qızıl orta" hesab olunur.

Samir