Yunanıstanda sürücülərə sürət məhdudiyyətlərinə ciddi əməl etmələri tövsiyə olunur. Çünki yol hərəkəti qaydalarının pozulmasına görə tətbiq edilən cərimələr olduqca yüksəkdir. 

HİT.az xəbər verir ki, bu barədə "Libertatea" nəşri məlumat yayıb.

Məlumata görə, Yunanıstanın yeni Yol Hərəkəti Məcəlləsi sürət həddinin aşılmasına görə daha sərt inzibati sanksiyalar nəzərdə tutur. Xüsusilə, saatda 200 kilometrdən artıq sürətlə hərəkət edən sürücülər 2 000 avro məbləğində cərimələnir və onların sürücülük vəsiqəsi bir il müddətinə əlindən alınır.

Yeni qaydalara əsasən, cəzalar pozuntunun ağırlığından asılı olaraq dəyişir.

Sürət həddi 20 km/saatadək aşıldıqda sürücüyə 150 avro cərimə tətbiq edilir. Sürət normadan 20–30 km/saat çox olduqda da cərimə 150 avro olaraq qalır, lakin əlavə olaraq sürücülük vəsiqəsinin qüvvəsi 20 gün müddətinə dayandırılır.

Sürət həddi 30–50 km/saat aşıldıqda isə sürücü 350 avro cərimə ödəməli olur. Bundan əlavə, sürücülük vəsiqəsi və nəqliyyat vasitəsinin qeydiyyat şəhadətnaməsi 30 gün müddətinə müsadirə edilir.

Sürət həddinin 50 km/saatdan çox aşılması halında cərimə 700 avroya yüksəlir və sürücülük vəsiqəsi 60 gün müddətinə geri alınır.

Yunanıstanda xüsusilə təhlükəli hesab edilən sürət pozuntularına görə daha sərt cəzalar tətbiq olunur. Avtomagistrallarda 150 km/saatdan, sürətli yollarda 130 km/saatdan və digər yolların kateqoriyalarında 120 km/saatdan artıq sürətlə hərəkət edən sürücülər 350 avro cərimə olunur. Bundan əlavə, onların sürücülük vəsiqəsinin qüvvəsi dayandırılır və nəqliyyat vasitəsinin qeydiyyat şəhadətnaməsi 30 gün müddətinə müsadirə edilir.

Samir