ABŞ Hərbi Dəniz Qüvvələri “Virginia Block V” sinfinə aid gələcək atom sualtı qayıqlarından birini dəniz dibində xüsusi kəşfiyyat və diversiya əməliyyatları üçün nəzərdə tutulan platformaya çevirməyi planlaşdırır.
HİT.az xəbər verir ki, “The War Zone” nəşrinin məlumatına görə, ABŞ donanması ümumilikdə 12 yeni “Virginia Block V” sualtı qayığı əldə edəcək. Onlardan ikisinin standart “Virginia Payload Module” (VPM) raket moduluna malik olmayacağı məlum olub.
Bu qayıqlardan biri artıq “USS Oklahoma” kimi müəyyənləşdirilib. İkinci VPM-siz sualtı qayığın isə dəniz dibində kəşfiyyat və xüsusi əməliyyatlar aparmaq üçün hazırlanacağı bildirilib. Onun adı hələ açıqlanmayıb.
Məlumata görə, xüsusi platforma “USS Oklahoma” və “USS Arizona” olmayacaq. Bu səbəbdən həmin rol korpus nömrələri 804-dən 813-ə qədər olan növbəti 10 sualtı qayıqdan birinə veriləcək.
Belə bir konsepsiya ABŞ donanması üçün tamamilə yeni deyil. Hazırda oxşar missiyaları “Seawolf” sinfinin xüsusi modifikasiyası olan “USS Jimmy Carter” yerinə yetirir. Bu sualtı qayıq əlavə gövdə bölməsinə malikdir və həmin hissə uzaqdan idarə olunan və pilotsuz sualtı aparatların istifadəsinə, eləcə də xüsusi avadanlıqların daşınmasına imkan verir.
Yeni “Virginia” variantında isə digər qayıqlarda raket sistemləri üçün nəzərdə tutulan məkanın bir hissəsindən dəniz dibi əməliyyatları üçün istifadə edilə biləcəyi bildirilir. Standart “Block V” qayıqlarında VPM modulu qanadlı raketlər üçün əlavə şaquli buraxılış qurğularını özündə birləşdirir.
ABŞ-ın bu cür platformaya marağının artmasının əsas səbəblərindən biri dəniz dibində yerləşən strateji infrastrukturdur. Sualtı ərazilərdən mühüm fiber-optik rabitə kabelləri və boru kəmərləri keçir. Bu obyektlər həm kəşfiyyat, həm də xüsusi əməliyyatlar baxımından mühüm əhəmiyyət daşıyır.
Nəşr qeyd edir ki, Rusiya və Çinin sualtı infrastruktur və xüsusi əməliyyatlar sahəsində fəaliyyətləri də ABŞ-ın bu istiqamətə diqqətini artırır.
“Virginia Block V” sinfinə aid sualtı qayıqların 2028–2034-cü illər arasında ABŞ donanmasına daxil olması gözlənilir. Yeni xüsusi versiyanın 2005-ci ildə xidmətə qəbul edilən “USS Jimmy Carter”in davamçısı və ya onu tamamlayan platforma ola biləcəyi bildirilir.
Samir
