Yaponiya hökuməti Kreml rəhbərinin Tokionun iddia etdiyi dörd adadan birinə səfərindən sonra Rusiyaya qarşı bir sıra əks tədbirləri nəzərdən keçirir. 

HİT.az xəbər verir ki, bu barədə “NHK” məlumat yayıb.

Mümkün cavab tədbirlərindən biri Tokionun Rusiyanın Ukraynaya müdaxiləsi ilə əlaqədar tətbiq etdiyi mövcud sanksiyaların sərtləşdirilməsi ola bilər.

Nəşrin məlumatına görə, Tokio Kuril adalarının “tarixi faktlara və beynəlxalq hüquqa əsasən” Yaponiyanın ayrılmaz hissəsi olduğunu vurğulayır.

Yaponiyanın Baş naziri Sanae Takaichi Putinin bu əraziyə səfərinin “Yaponiya hökumətinin ardıcıl mövqeyi ilə ziddiyyət təşkil etdiyini” bildirib. O, səfərin “Yaponiya xalqının ictimai rəyinə zərər vurduğunu və tamamilə qəbuledilməz olduğunu” deyib.

Baş nazirin sözlərinə görə, səfər orta və uzunmüddətli perspektivdə Yaponiya ilə Rusiya arasında münasibətlərin bərpasını daha da çətinləşdirib.

Yaponiyanın xarici işlər naziri Toşimitsu Motegi Rusiyanın səfirini dəvət edib. Görüş zamanı Motegi Putinin səfərinə qəti etirazını bildirib və səfərin ikitərəfli münasibətlərə son dərəcə mənfi təsir göstərdiyini vurğulayıb.

Jurnalistlər xatırladırlar ki, 2022-ci ildə Rusiya Tokionun Ukraynaya müdaxilə səbəbilə Moskvaya qarşı sanksiyalar tətbiq etməsindən sonra Yaponiya ilə sülh müqaviləsi üzrə danışıqları dayandırdığını açıqlamışdı.

Bununla belə, Yaponiya Ukraynadakı müharibəyə baxmayaraq Rusiya ilə diplomatik əlaqələri davam etdirir. Belə ki, ötən ay Motegi Rusiyanın xarici işlər naziri Sergey Lavrovla danışıqlar aparıb.

Putinin bu həftə Kuril adalarına səfəri onun hakimiyyəti dövründə həmin əraziyə ilk səfəri olub. Bununla belə, digər yüksəkvəzifəli Rusiya rəsmiləri daha əvvəl Kuril adalarına səfər ediblər.

Məsələn, Dmitri Medvedev bu əraziyə dörd dəfə gedib: bir dəfə prezidentliyi, üç dəfə isə baş nazirliyi dövründə.

Putinin səfəri Tokioda kəskin reaksiyaya səbəb olub. Yaponiya hakimiyyəti bir daha Kuril adalarının ölkənin ayrılmaz hissəsi olduğunu vurğulayıb.

Samir