Nyu-York sahillərində havadan lentə alınan görüntülər dənizin səthində nəhəng tünd ləkələri üzə çıxarıb. Minlərlə köpəkbalığı, skat və menhaden balığının eyni ərazidə toplanması nəticəsində yaranan qeyri-adi hərəkətliliyin arxasında isə tək bir qida mənbəyi dayanır.
HİT.az xəbər verir ki, Nyu-York sahillərində yayın son günlərində qeyri-adi dəniz hərəkətliliyi müşahidə olunub. Minlərlə köpəkbalığı, skat və sıx menhaden balığı sürüləri sahilə yaxın sularda bir araya gəlib. Havadan çəkilən görüntülərdə okeanın səthində kilometrlərlə uzanan tünd rəngli sahələr görünüb.
Avqustun sonlarında Şirli şəhərindəki Smit Point çimərliyi və Fayr-Aylend sahillərində pilotsuz uçuş aparatı ilə lentə alınan görüntülərdə açıq boz rəngli dəniz suyunun üzərində nəhəng tünd ləkələr diqqət çəkib. Bildirilib ki, bu görüntülər bölgədə toplanan menhaden balığı sürülərindən qaynaqlanıb.
Lonq-Aylend və Fayr-Aylend ətrafında illərdir fotoşəkillər çəkən Mayk Buş da gördüyü mənzərənin qeyri-adi olduğunu bildirib. Buş belə sıx köpəkbalığı toplanmasına daha əvvəl şahid olmadığını deyib. Onun sözlərinə görə, canlı qrupları sahildən təxminən 300 metr aralıda yerləşib.
Bölgədəki hərəkətliliyin mərkəzində yerli əhali arasında "bunker" adlandırılan menhaden balıqları dayanır. Bu balıqların ilin əvvəlində sahilə gec çatması səbəbindən dənizdəki hərəkətliliyin bir müddət nisbətən sakit olduğu bildirilir.
Balıqların bölgəyə gəlməsi ilə onları izləyən köpəkbalıqları və miqrasiya edən skatlar da sahilə doğru hərəkət edib. Qidalanma prosesində bir neçə köpəkbalığı növünün iştirak etdiyi qeyd olunur.
Dəniz səviyyəsindən təxminən 6 metr yüksəkliyə sıçrayaraq öz ətrafında fırlana bilən fırlanan köpəkbalıqları ilə yanaşı, çəkicbaş və öküz köpəkbalıqları da ərazidə müşahidə olunub.
Nyu-York Ştatının Ətraf Mühitin Mühafizəsi Departamenti yayın sonlarında su temperaturunun yüksəlməsinin bu cür toplanmalar üçün əlverişli şərait yarada biləcəyini bildirir. Lakin qurumun məlumatına görə, bu miqyasda canlı sıxlığı olduqca nadir hadisədir.
Hadisənin meydana gəlməsinin tək bir səbəbi yoxdur. Kommersiya balıqçılığı kvotalarındakı dəyişikliklər, suyun temperaturu və okean cərəyanları kimi müxtəlif amillərin bir araya gəlməsi menhaden sürülərinin və onları izləyən yırtıcıların sahilə yaxınlaşmasına səbəb ola bilər.
Bu baxımdan ortaya çıxan mənzərə dəniz ekosistemindəki təbii qida zəncirinin bir hissəsi kimi qiymətləndirilir.
Bununla belə, sahilə yaxın sularda canlıların bu qədər sıx toplanması üzgüçülər üçün diqqətli olmağı tələb edir. Külək şəraitinin dəyişməsi halında canlı qrupları üzgüçülərin olduğu ərazilərə daha da yaxınlaşa bilər.
Mütəxəssislər xüsusilə bulanıq sulardan və sıx balıq sürülərindən uzaq durmağı tövsiyə edir.
Samir
