İngiltərədə iki qunduz cəmi bir il ərzində 35 metr uzunluğunda bənd inşa edərək ərazidə yeni gölməçə yaradıb. Bu təbii quruluş sonradan quraqlıq dövründə suyun saxlanmasına və bir sıra heyvan növləri üçün yaşayış mühitinin formalaşmasına kömək edib.

HİT.az xəbər verir ki, 2025-ci ildə vəhşi təbiətə buraxılan iki Avropa qunduzu axının qarşısını alaraq suyun toplanmasına səbəb olan bəndlər sistemi qurub. Nəticədə əvvəllər kölgəli olan meşəlik ərazi tədricən bataqlıq və su-bataqlıq zonasına çevrilib.

Müşahidə kameraları yeni yaranan gölməçədə balıq tutan su samuru, ov edən anbar bayquşu, eləcə də müxtəlif quş növlərini qeydə alıb. Ərazidə bitkilər və su-bataqlıq mühitinə uyğunlaşan digər canlılar üçün də yeni imkanlar yaranıb.

National Trust təşkilatının 2026-cı ilin avqustunda yayımladığı yenilənmiş hesabatda bildirilib ki, qunduzların yaratdığı bəndlər quraqlıq zamanı da suyu saxlamaqda davam edib. Təşkilatın layihə üzrə məsul əməkdaşı Cen Krisford qısa müddətdə ekosistemdə baş verən dəyişikliklərin diqqətçəkən olduğunu bildirib.

Qunduzlar 2025-ci il martın 5-də Şotlandiyadan gətirilərək İngiltərədə vəhşi təbiətə buraxılan dörd Avropa qunduzundan ikisidir. Onların məskunlaşdığı ərazidə müşahidə olunan dəyişikliklər su-bataqlıq sahələrinin quraqlıq şəraitində vəhşi heyvanlar üçün əhəmiyyətini göstərir.

Maraqlıdır ki, qunduzların qurduğu bəndlərin ətraf əraziyə başqa faydaları da olub. National Trust təşkilatı güclü yağışlar zamanı bəndlərin yaxınlıqdakı yolun qorunmasına kömək etdiyinə dair əlamətlərin olduğunu açıqlayıb.

Samir