Fransanın Senon kəndində aparılan arxeoloji qazıntılar zamanı təxminən 1800 il əvvəl gizlədilmiş, içərisində on minlərlə Roma sikkəsi olan üç qab aşkarlanıb. Tapıntının ümumilikdə 40 mindən çox sikkədən ibarət olduğu ehtimal edilir.

HİT.az xəbər verir ki, araşdırma Fransanın Milli Preventiv Arxeoloji Tədqiqatlar İnstitutu (INRAP) tərəfindən aparılıb. Mütəxəssislər qabların qədim Roma dövrünə aid yaşayış binasının döşəməsində xüsusi hazırlanmış çökəkliklərə yerləşdirildiyini müəyyən ediblər.

Numizmat Vensan Jenevyevin hesablamalarına görə, qablardan birində təxminən 38 kiloqram ağırlığında 23-24 min sikkə olub. İkinci qabın isə təxminən 50 kiloqram ağırlığında olduğu və 18-19 min sikkə saxladığı güman edilir.

Maraqlıdır ki, qabların boğaz hissələri döşəmə ilə eyni səviyyədə yerləşib. Bu isə onların sadəcə basdırılıb unudulmadığını, əksinə, sahiblərinin ehtiyac yarandıqca sikkələrdən istifadə etdiyini ehtimal etməyə əsas verir. Bəzi sikkələrin qabların kənarlarına yapışması da sonradan yeni pulların əlavə edildiyini göstərir.

Sikkələrin əsasən eramızın 280-310-cu illəri arasında gizlədildiyi düşünülür. Onların arasında Qalliya imperiyası ilə əlaqəli hökmdarlar Viktorinin, Tetrik I və Tetrik II-nin təsvir olunduğu nümunələr də var.

Arxeoloqlar hesab edirlər ki, bu tapıntı mütləq müharibə və ya təhlükə səbəbindən gizlədilmiş xəzinə olmayıb. Qabların yaşayış evinin daxilində yerləşdirilməsi onların uzunmüddətli əmanət kimi istifadə edildiyini göstərir.

Qazıntılar zamanı müəyyən edilib ki, yaşayış məntəqəsi IV əsrin əvvəllərində güclü yanğın nəticəsində dağılıb. Üç qabdan biri isə hələ qədim dövrdə götürülüb, digər ikisi isə müasir arxeoloji qazıntılara qədər torpağın altında qalıb.

Samir